Аталған фестиваль ТҮРКСОЙ мен барша түркі елдері арасындағы ынтымақтастықты одан әрі нығайту, заманауи театр өнерінің озық үлгілерін көрсету, халықаралық байланыстарды дамытуға қолдау көрсету, жаңа сахналық стильдердің танымал болуына жағдай жасау мақсатында ұйымдастырылған. Мәдени дода аясында ТҮРКСОЙ-ға мүше 6 елдің театр ұжымдары көрерменге өз туындыларын ұсынды. Атап айтсақ, Самарқанд музыкалық-драма театры (Өзбекстан), Қасымалы Жантөшев атындағы Ыстықкөл музыкалық-драма театры (Қырғызстан), Түркістан музыкалық-драма театры (Қазақстан), Ыстанбұл мемлекеттік театры (Түркия), Мақтымқұлы атындағы музыкалық-драма театры (Түрікменстан) және Әзербайжан мемлекеттік академиялық ұлттық драма театры төрт күн бойы сахнада бақ сынасты.
Өнер жарысының алғашқы күні Әзербайжан мемлекеттік академиялық ұлттық драма театры Халық жазушысы Ілияс Ефендиевтің «Әмірші мен қызы» пьесасы бойынша сахналанған «Қарабахнама» спектаклін ұсынды. Қазақстан атынан Түркістан облысының Мәдениет және туризм басқармасының Түркістан музыкалық-драма театры Баку халық театрының сахнасында «Қорқыт туралы аңыз» пластикалық спектаклін қойды. Либретто авторы – жазушы, драматург Ермек Аманшаев. Қойылымның қоюшы режиссері және хореографы – Константин Семенов. Көркемдік жетекшісі – Айнұр Көпбасарова.
«Біздің қойылым адамды көп нәрсені ойлауға мәжбүрлейтін философиялық бағытты ұстанады. Мәселен, ата-бабаларымыздың рухани тамырының негізі не, сыры неде? Көрермен залдан ойланып шығып, осы және осыған ұқсас сұрақтарға жауап іздей бастаса, бұл біздің қоғамды ояту миссиясының орындалғанын білдіреді», дейді театрдың көркемдік жетекшісі.
Театр труппасы келесі жылдың наурыз айында «Қорқыт туралы аңыз» пластикалық қойылымымен Францияның Лион қаласына аттанады. Ал сәуір айында Диана Вишнева заманауи хореография фестиваліне қатысады.
