Сәкен театрының жанынан үш ай бұрын ғана құрылған қуыршақ труппасы әлем елдерінен өтінім жіберген 200-ге тарта өнер ұжымының арасынан іріктелген 30 театрдың қатарында болған.
Әртістер әрқайсысы сахнада бір емес, үш қуыршаққа жан бітіріп, үш рөлді сомдап шықты. Ал спектакльдегі 11 қуыршақты режиссер Айдын Салбанның жетекшілігімен театр ұжымы жасаған.
Бұл қуыршақ труппасы Оманнан олжалы оралмас бұрын Алматыда өткен «Almaty Puppet Festival» халықаралық фестивалінде де «Қарлығаштың құйрығы неге айыр?» ертегісін сахналап, «Үздік сценография үшін» жүлдесін еншілеген еді.
Қазан айының басында Жетісу төрінде аты аңызға айналған актриса Бикен Римованың 100 жылдығына арналған BIKEN-l халықаралық театр фестивалінде О.Бөкейдің «Атау кере» драмасын қойып, «Үздік режиссура» жүлдесін қанжығалағанын да айтып өтуіміз керек. Мұның да қоюшы-режиссері – Айдын Салбан.
Талдықорғаннан кейін Қызылжарда белгілі мемлекет және қоғам қайраткері Т.Жүргеновтің 125 жылдығына арналған Қазақстан театрларының фестивалінде де «Үздік сценография» аталымына лайық деп танылды.
Астанаға гастрольмен барып, елордалық көрерменге «Ұлтқа қызмет», «Текебұрқақ», «Айналайын», «Атау кере» спектакльдерін көрсетті.
Қарағандының өнер ұжымы республикалық деңгейде ғана емес, халықаралық сахналарда да сәтті өнер көрсетіп, көрерменнің ыстық ықыласына бөленіп, сыншылардың жоғары бағасын алып жүр.
Қарағанды облысы
