Инвестиция • 22 Қараша, 2023

Инвестициялық табыстың игілігін көреді

112 рет
көрсетілді
3 мин
оқу үшін

Биыл 1 қазандағы есеп бойынша зейнетақы активтерінің жалпы көлемі 17,2 трлн теңгеден асты, бұл былтырғымен салыстырғанда 22,1 пайызға артық. Осы ретте Ұлттық банктің сенімгерлік басқаруындағы БЖЗҚ зейнетақы активтері 99,9 пайыз болды. Зейнетақы активтерін сақтау және табыстылықты қалыптастыру үшін Ұлттық банк өзінің инвестициялық портфелін үнемі әртараптандырады. Яғни активтер белгілі бір көлемде үйреншікті қаржылық құралдарға салынбайды, жағдайды ескере отырып жүйелі түрде өзгеріп отырады.

Инвестициялық табыстың игілігін көреді

Ұлттық банктің сенімгерлік басқа­руындағы БЖЗҚ инвестициялық порт­фелінің жалпы көлеміндегі мем­лекеттік бағалы қағаздардың (МБҚ) үлесі бір жылда 61,10 пайыздан 64,98 пайызға (оның ішінде ҚР МБҚ – 47,18 па­йыз), сыртқы басқарудағы актив­тердің үлесі 9,8 пайыздан 12,71 пайыз­ға дейін өсті. Қазақстан Республикасы және шетелдік эмитенттердің корпо­ра­тивтік облигацияларының үлесі керісінше 19,08 пайыздан 15,56 пайыз­ға дейін, депозиттер үлесі 7,36 пайыздан 4,12 пайызға дейін төмендеді.

Сонымен қатар портфельді әрта­раптандыру валютамен де жүзеге асы­­­ры­лады. 2023 жылғы қыркүйектің аяғын­да қаржы құралдарының инвес­ти­ция­лық портфелі валюта үлесі мынадай:

  • ұлттық валюта – 68,17 пайыз (бір жыл бұрын – 70,17 пайыз);
  • АҚШ доллары – 31,8 пайыз (бір жыл бұрын – 29,75 пайыз);
  • басқа валюталар – 0,03 пайыз (бір жыл бұрын – 0,08 пайыз).

«Портфельдегі мерзімді өзге­ріс­тер­ге негізделген мұндай инвес­ти­циялық стратегия оң нәтиже­ле­рге әкеледі. Биыл тоғыз айда ин­вес­­­тициялық белсенділік нәти­же­сін­де, сондай-ақ валюта бағамы­ның тұрақ­сыздығына және қаржы құрал­дарының нарықтық құнының өзге­руіне байланысты таза инвести­ция­лық табыс көлемі 1,4 трлн теңгеге жетті. Бұл былтырғы сәйкес кезеңмен салыс­тырғанда 91,1 пайызға артық», дейді Ranking сарапшылары.

БЖЗҚ зейнетақы активтері бойын­ша инвестициялық қызметтің мұндай оң нәтижелері бұрын-соңды болма­ған геосаяси шиеленіс, турбуленттік эко­номикалық жағдай және ақша-несие саясатының қатаңдауы кезеңінде болғанын атап өткен жөн дейді сарапшы­лар. Сонымен қатар Қазақстанның бұл мәселедегі ұстанымы басқа елдермен салыстырғанда қолайлы және әсерлі.

«Мысалы, Норвегияның мемлекет­тік зейнетақы қоры (GPFG), әлемдегі ең ірі тәуелсіз әл-ауқат қоры 34 млрд доллар көлемінде үлкен шығынға ұшырады. Жалпы, Thinking Ahead Institute (TAI WTW) 22 зейнетақы нары­ғын қамтитын зерттеуі (P22) 2022 жылдың соңында зерттелген елдер­дің зейнетақы активтерінің жал­пы көлемі бір жыл ішінде 15,4 пайыз, яғни 47,9 трлн долларға дейін төмен­дегенін көрсетті. Бірден 22 елдің ішінде дамыған және дамушы 17 ел шығынға ұшырады», дейді Ranking.

Табыстылық деңгейіне келетін болсақ, жағдай мынадай: 2023 жылдың екінші тоқсанының соңында зейнетақы активтерінің кірістілігі АҚШ-та – 4,1 па­йыз, Канадада – 1,3 пайыз, Еуро­аймақта – 1,2 пайыз, Швейцарияда – 1,7 па­йыз, Ұлыбританияда – бірден минус 6,3 пайыз. Осылайша, БЖЗҚ зейнетақы активтері бойынша инвести­циялық қызмет нәтижелері оң деп сенім­мен айта аламыз: жаһан­дық жағ­дайға қарамастан, ел азамат­тарының зейнетақы активтерін сақтап қана қой­май, көбейтіп жатыр.