Суретті түсірген – Ерлан ОМАР, «EQ»
Жүлдегерлерді марапаттау рәсімінде Тіл саясаты комитетінің төрағасы Ербол Тілешов осы байқаудың өтіп келе жатқанына 20 жылға жуық уақыт өткенін, соның ішінде БАҚ өкілдерінің тілге деген жанашырлығы мен азаматтық жауапкершілігін жоғары бағалап, жылы ілтипатын жеткізді. Қазір аталған байқауға тек қазақ тіліндегі емес, мемлекеттік тіл туралы орыс тілінде қалам тербейтін журналистер де қатыса бастаған. Мәселен, биыл байқауға 64 өтінім арқылы 145 материал келіп түссе, соның 123-і қазақша, 17-сі орыс тілінде болған. Осыдан-ақ оның салмағы қандай екенін білесіз.
Дәстүрлі байқауға Парламент Сенатының депутаты Бибігүл Жексенбай, «Қазақ газеттері» ЖШС бас директоры Дихан Қамзабекұлы, журналист Махат Садық, Қожа Ахмет Ясауи атындағы Халықаралық қазақ-түрік университетінің профессоры Молдияр Ергебеков, Қазақ медиақауымдастығының төрағасы Ербол Азанбеков секілді елімізге белгілі азаматтар қазылық етті.
Сонымен «Мемлекеттік тіл және БАҚ-2023» байқауының Гран-при жүлдесі мен 1 000 000 теңге сертификаты «Халық үні» ақпарат агенттігінің тілшісі Айгерім Таубайға табыс етілді. Басылым беттерінде, сондай-ақ интернет-ресурстарда жарық көрген «Үздік мақала» аталымында бірінші орынды Атырау облыстық «Прикаспийская коммуна» газетінің аға тілшісі Анжела Ли жеңіп алса, екінші орынды «Qazcontent» El.kz АҚ ақпараттық агенттігінің тілшісі Амангүл Тілей иемденді. Үшінші орынды Астанадағы №38 мектеп-лицейінің қазақ тілі мен әдебиеті пәнінің мұғалімі Біржан Ахмер мен «Қазақ үні» республикалық қоғамдық-саяси газетінің редакторы Достан Елдес өзара бөлісті. «Үздік теле және радиобағдарлама» аталымында бірінші орын «Қазақ радиосының» редакторы Азамат Тілеповке бұйырса, екінші орынды «Жетісу» телеарнасының қызметкері Мұрат Жұмабай еншіледі.
Сонымен қатар байқау қорытындысы бойынша 9 қатысушы ынталандыру сыйлығына ие болды. Солардың ішінде «Egemen Qazaqstan» газетінің тілшісі Жадыра Мүсілім де бар екенін айта кетейік.
