Аймақтар • 24 Желтоқсан, 2023

Жолда қалғандарға жанашырлық

137 рет
көрсетілді
5 мин
оқу үшін

Бет қаратпайтын аңызақ жел, үскірік аяз. Жолда қалған жолаушылар қорған­сыздың күйін кешіп тұр. Жол бойы тоқтаған ондаған көлік ішіндегі жұрттың көңіл күйі жоқ. Боранды күні жолға шыққаны үшін өздерін жазғыратын секілді...

Жолда қалғандарға жанашырлық

Екі аптаға жуық уақыт бұрын тосын мінез танытқан табиғат жамбылдықтарды бір сынап алды. Екі ауданда төтенше жағ­­дай жарияланып, оннан астам жолаушы­лар по­йызы Шу бекетінде аялдауға мәжбүр болды. Жалпы, екі аудандағы бұрқасын боран кезін­де бес мыңға жуық адам құтқарылып, оларға жергілікті билік, ауыл халқы, кәсіпкерлер қолдан келген көмекті аяған жоқ. 

Бірқатар бағыттағы жол жабылған уақытта жолаушылардың еңсесі түсті, қамықты, жабықты. Бірақ бұл күні төтенше жағдайлар жөніндегі департамент өкіл­дері, полиция қызметкерлері жұмыл­ған жұды­рық­тай іске кірісті. Жолда қалған жолаушыларды жылы ғимараттарға орналастыру, оларды ыстық тамақпен қамту жұмыстарына жергілікті билікпен қатар ауыл азаматтары, кәсіпкерлер де жұдырықтай жұмылды.

Жолаушылар пойызы арқылы мыңнан астам азамат боранды бекет саналған Шу стансасы маңында аялдады. Бет қаритын үскірік аяз бен желдің ызғары оларды әбден қалжыратқан. Түксиген қабақтардан іштегі өкініштің табы аңғарылатындай.

Жанарын мұң шалған отандаста­ры­мыздың жанына демеу болуға ты­рыс­­қан жергілікті азаматтар осы күні кү­ре­ жолдың бойына да, теміржол бе­ке­тіне де асықты. Бірінің қолында са­маурын, енді бірінің қо­лын­да ыс­тық тамақ салынған сөмкелер. Жолда қалған жұрт­­ты қолдауға асыққан аза­­маттардың ниетіне жан сүй­сінеді. Аудан, ауыл әкім­дері де шапқылап жүр. Өз ер­кімен іске кіріскендер де бар. Бәрінің ниеті де, пейілі де таза, адал. Жұдырықтай жұмылған жұрт­тың көзі­нен жанашырлық байқала­ды. Жа­ны жабыққан ағайынға қолын­дағы жы­лы-жұмсағын үлестіріп жүр. Бойы жы­лын­ған жұртқа да тіл бітті. Алғысын жаудырып жатыр.

Жолда қалған жолау­шы­ларға жылы-жұмсағын апарып, ыстық тамақпен қамтамасыз еткен кәсіп­кер­­лердің бі­рін сөзге тартып көргенбіз. Сабазың басын ала қашты. Неге? Түсіндірді.

«Мұндай жағдайда бір­лік керек. Жол­ға шыққан аға­йын елсіз жерде қал­мады. Жа­ратқан ондай қасіреттен сақ­тасын. Бастысы, бәрі де елдің ортасына жақын маңда жүр. Қазақ қашанда қолда барын аямайтын халық қой. Та­рихқа зер салсақ, әр елден ауып кел­ген ағайынға да мейірімін төкті емес пе? Қолындағы нанын бөліп жеді. Онысын міндетсінген жоқ. Ол уақытта жағдай басқаша еді. Қазір мүлде басқа кезең.

Төтенше жағдай ке­зін­­де барымызды ты­ғып қаннен қаперсіз жат­­сақ, адам­дығымызға, аза­­­­мат­тығымызға сын ғой. Бір дүние анық. Қолы­мыз­да тит­­тей де болса қар­жы бар болса, ол бізге Жа­рат­қанның әмірімен бұ­йыр­­ды. Сондықтан бұл жақ­сы­лықты Жаратқан жасап отыр деп түсінген абзал. Қа­­йырымдылық Құдай­­­дан. Біз себепшіміз. Онымен мақтануға бол­майды», деді ол.

Мұндай сөзді айтқандар аз болған жоқ. Жана­рынан мейірім нұры себезгі­леген ауылдардағы ағайынның жол­да қалған жолаушы­лар­ға көрсеткен қамқорлығы біз­дің де жанымызды тебірен­тті. Жасаған жақсылығын жар­намалаудан бас тарт­қан жұрттың кір­шіксіз таза кө­ңілі қуантты.

«Мұндай боран болады деп еш­кім күткен жоқ. Қазақ қай кезде де қам­қорлық жасаудан алды­на жан салмайтын халық қой. Бұл сынақта да бір­лігіміздің бекем екенін көрсеттік. Қытымыр аязда кез келгеніміз жолда қалуымыз мүмкін. Қиындыққа тап бол­ған жолаушыларға қолдан келген көмегін аямаған аза­маттарға тек ал­ғыс айта­мыз», дейді Ескі Шу ауыл­дық округінің әкімі Нұрлан Абашов.

Күре жолдың бойында көліктерін қаңтарып қой­ған жолаушылар жы­лы-жұм­сағын алма-кезек ұсынған жер­гілікті жұртпен достасып та үлгерген се­кіл­ді. «Аштықта жеген құй­қаның дәмі ауыздан кетпес» дейміз ғой. Бұл да ту­ра соған ұқсас жағ­дай. Жол бойы. Тіршіліктің исі сезіл­мей­ді. Мұндайда жа­салған жақ­сылық кімнің жадынан өшсін?

«Толассыз жауған қар мен ұйытқып соққан жел біз­ді әбігерге түсір­ді.Бағы­тымыз беймәлім. Қайда тұр­­­­ға­нымыз да түсініксіз. Не интернет, не бас­қа жоқ. Қан­дай амал қыла­рымыз­ды білмей тұрғанда барлық құрылымның қызметкер­ле­рі қолдан келген көмегін аямады. Ауылдағы жұрт та ыстық тамағы мен қолында барын алып, қолұшын берді. Сол үшін де оларға риясыз алғысымды айтамын», дейді жолда қалған Юлия есімді орыс қызы.

Жел ысқырған сол күн­­дері әлеу­меттік желі­лер­де түрлі бейнежазба та­ра­ды. Қазақ халқының ал­ғау­сыз пейі­ліне алғыс біл­дір­ген­дердің қата­рын­да қазақ­тар­дан бөлек, әр түрлі этнос өкіл­дері бар. Олардың бәрі де ал­ғысын жаудырып жатты.

Иә, алғашқы қар Шу мен Қор­дай халқын әбден састырды. Бірақ жер­гілікті билік пен жаны жомарт аза­мат­тардың бірлесуінің арқасында жам­былдықтар бұл сыннан да сүрінбей өтті. Азаматтар жұмылған жұдырықтай іске кірісіп, бес мыңға жуық адамды дер кезінде құтқарды. Осы­лайша, бірлік бар жерде тір­лік болатынын аңғартты.

 

Жамбыл облысы