Іс-шараға 9-13 жас аралығындағы оқуда үздік, спортта жетістікке жеткен 300-ге жуық бала қатысты. Оларды мектептегі қамқоршылық кеңес ата-аналарымен бірге таңдады. Сонымен бірге көпбалалы отбасынан шыққан, әлеуметтік жағынан аз қамтамасыз етілген оқушылар да жаңажылдық мерекенің қонағы болды. Қала әкімі Ғабит Сыздықбеков Президент Қасым-Жомарт Тоқаевтың атынан балаларды жаңа жыл мерекесімен құттықтады.
«Жаңа жыл жағымды жаңалықтарға, жаңа жеңістер мен толағай табыстарға бай жыл болсын! Кез келген жеңіс пен жетістік үлкен еңбекпен келеді. Ол үшін өзіңді жан-жақты дамыту керек. Сабаққа зейін қойып, көп кітап оқып, спортпен айналысып, өнерге ұмтылу қажет. Ұлы істер мен биік белестерді бағындыратын жас ұрпақ – сендерге сенім артамыз. Ата-аналарыңызды құрметтеңіздер, үнемі сендер үшін қуанып жүретін болсын. Кішіге қамқор болып, үлгі-өнеге көрсетіп жүріңіздер», деді шаһар басшысы.
Мерекелік іс-шарада балалар ән шырқап, би биледі. Қызықты сахналық қойылымдар балғындардың көңіл күйін ерекше шаттыққа бөледі. Сонымен бірге «Мейір» балет тобының жас бишілері өз өнерлерін көрсетті. Оқушылар сарайының ұстаздары түрлі жануардың кейпінде балалардың көңілін аулады, мектептен тыс үйірме тәрбиеленушілері, Саз мектебінің скрипкашы шәкірттері де өнерлерін оқушыларға паш етті.
Қалалық білім басқармасының басшысы Нұргүл Шамшиеваның айтуынша, жылдағы дәстүр бойынша өтетін Президенттің жаңажылдық шырша мерекесінде балалар 100 мың теңгенің сертификатына, үш тілде жазылған «Атамекен аңызы» кітабына, сондай-ақ тәттілері бар сыйлықтарға ие болды.
ШЫМКЕНТ
