Маэстро Алан Бөрібаевтың Швейцариядан бастап Жапонияға дейінгі көпқырлы шығармашылық жолы, оның зор білімі мен мол тәжірибесі бас дирижерге түрлі операларды қоюмен қатар белсенді музыкалық бағдарлама жасай отырып, классикалық өнердің жаңа қырларын табуға мүмкіндік беріп келеді. «Жан-жақты Рос- сини» концерті де сол санаттан табылып, елордадағы айтулы мәдени оқиғаға айналды.
Жалпы, «Астана опера» театрында италиялық кемеңгер Джоаккино Россинидің шығармашылығы «Севильдік шаштараз», «Алжирдегі италиялық қыз» және «Жібек саты» тәрізді үш комедиялық опера арқылы таныстырылған. Десе де концерт аясында көрермендердің керемет опералық және симфониялық туындыларымен танымал композиторға салмақты суретші ретінде қарауға тамаша мүмкіндік туды.
«Жан-жақты Россини» – бұл композициялардың жиынтығы ғана емес, сонымен қатар классиктің музыкалық мұрасына саяхат іспетті. Онда сан алуан бейнелер молынан көрініс тапқан. Мәселен, Stabat Mater шығармасында көпшілік күшті эмоциялар туғызатын терең рухани реңктерді табады. Ал «Семирамида» операсындағы арияда басты кейіпкердің ғашықтық уайымы шынайы жеткізілді. Айта кетейік, тағдырдың жазуына қарамастан, Россини өз туындысында Семирамиданы нәзік сезімдерге бейім әрі арманшыл әйел ретінде көрсетеді.
Қызықты дуэттер, түрлі сипаттағы ариялар мен әсерлі каватиналардан тұратын бағдарламаның әрбір бөлігі бірегей. Көрермендер аудиториясы жеңіл әзілден бастап, трагедияға дейін Россини бейнелерінің сан алуандылығын сезінді және әрбір тыңдаушы осы Романтизм бастау алған дәуірге музыкалық саяхатта өзі үшін ерекше дүние тапқаны сөзсіз.
Көңілге көктем сыйлаған классикалық музыка кешінде С.Ахметова, А.Қапонова, Т.Вицинская, С.Мұратбекова, М.Исламова, Г.Алдадосова, Ш.Расылхан, Е.Саипов, А.Габдиев, Ә.Зейнолла, А.Әбілда, Л.Аламанова, С.Бақытжан сынды театрдың белді әртістері көрермендерге өз өнерлерін тарту етті.
Солистер жарқын әрі мазмұнды вокалдық өнер көрсетулерімен концерттің сәнін келтірді.
Алан Бөрібаевтың жетекшілігіндегі «Астана опера» Симфониялық оркестрінің және театр солистерінің қатысуымен Күләш Байсейітова атындағы Камералық зал сахнасында өткен концерт ұлы әуендер мен шебер орындаушылардың кәсіби кемелдігін паш еткен нағыз музыкалық мерекеге айналды.
