Фото: Қазақстан Ұлттық банкі
«Бұл – «Сақ стилі» жаңа сериясының алғашқы банкнотасы. Ол қазақы ою-өрнектің бастау негізі саналатын және көшпенділердің бірегей мәдениетінен бастап бүгінгі Қазақстанға дейінгі ел мұрасын бейнелейтін «Сақ стилі» элементтеріне негізделген», делінген Қазақстан Ұлттық банкінің хабарламасында.
Банк жаңа номиналдарды жалған ақшадан ажыратуға көмектесетін бірнеше қорғаныш элементтерін көрсетті:
- Банкнотаға бедер салатын алтын интаглио атты арнайы баспа тәсілі қолданылған. 5 000 теңгеде алтын түсті күрделі бедерлі бояумен Қазақстанның елтаңбасы басылған.
2. Банкнотаның бет жағының жиегінде шығыңқы, күрделі бедерлі элементтер бар, оларды саусақпен сипап сезуге болады.
3. Банкнота бетінде екі түсті үзік-үзік қорғаныш сызық та бар. Ол, жарық түскенде, біртұтас сызық болып анық көрінеді. Банкнотаға басқа қырынан қараған кезде, қызыл және көк түстер бір-бірін кезектесе алмастырып тұрғандай әсер беретін динамикалық эффект байқалады.
4. Банкнотаның бет жағында бүркіт бейнесіндегі көлемді, айшықталған патч қорғаныш элементі орналасқан. Банкнотаны аударғанда, номиналдың құнын білдіретін цифр ою-өрнекке айналады, сондай-ақ күн белгісінің сәулелері жан-жаққа таралғандай әсер байқалады.
5. Кей көркемдік элементтерге арнайы алтын түстес жылтыр бояу қолданылған.
6. Банкнотаға жарық түскенде, номиналдың құны көрсетілген ерекше белгі анық байқалады.
7. Банкнотаның екінші бетінде «Бүркіт» артефактінің бейнесінде көлемді Спарк элементі орналасқан. Банкнотаға басқа қырынан қараған кезде, Спарктың түсі алтын түстен нефрит түске өзгереді.
Мұндай тексеру тәсілдері бірнеше секунд уақытты алады және кез келген адамға банкнотаның түпнұсқалығын анықтауға көмектеседі.
