Тараз қаласынан 100 шақырым қашықта жатқан Талас ауданында өткен жылы 52 көшенің жолы жөндеуден өтті. Әрине, аз жұмыс емес. Осылайша, тұрғындар көтерген өзекті мәселе оңынан шешіліп отыр. Аудан әкімдігінің баспасөз қызметі келтірген дерекке жүгінсек, ауданға қарасты елді мекендердегі жолдарды жөндеу жұмыстары «Ауыл – ел бесігі» бағдарламасы аясында жүзеге асқан.
«Ауылдықтар «Ауыл – ел бесігі» бағдарламасының шарапатын көріп отыр. Мәселен, өткен жылы Үшарал және Ойық ауылдық округтерінде барлығы 15,65 шақырымды құрайтын 21 көшені жөндеуге 670 млн теңге қаражат бөлінген еді. Қазынадан қарастырылған қаражаттың 90 пайызы республикалық, қалған 10 пайызы аудандық бюджеттің үлесінде екенін айта кеткен жөн. Көшелердің жолын жөндеу мәселесіне келгенде жергілікті тұрғындардың талап-тілегі толықтай ескерілді. Жол жөндеу жұмыстары уақтылы әрі тиянақты атқарылғанын айта кеткен ләзім. Жергілікті атқарушы билік өкілдері қолға алынған жұмыстың сапасына айрықша ден қойды. Мемлекеттік сатып алу ашық конкурсы дер кезінде өткізіліп, жеңімпаз мердігерлермен келісімшарттар уақтылы рәсімделіп, орта жөндеу жұмыстары межелі уақытта жүргізілді. Бүгінгі таңда жоспарланған жұмыс толығымен аяқталды», дейді Талас ауданының әкімі Нұрбол Жүнісбеков.
Аудан басшысы келтірген дерекке сенсек, «Ауыл – ел бесігі» бағдарламасы аясында бөлінген қаражат үнемделіпті. Сол үнемделген қаржы есебінен Бостандық, Ақкөл және Ойық ауылдарындағы жалпы ұзындығы 3,65 шақырымды құрайтын 12 көшенің жолдары орта деңгейдегі жөндеуден өткен.
Талас ауданының орталығы Қаратау қаласында да жол жөндеу жұмыстары талапқа сай атқарылған. Моноқаладағы жалпы ұзындығы 16,8 шақырымды құрайтын алты көшенің жолы тұрғындар тілегіне сай ретке келтірілген.
Н.Жүнісбековтің айтуынша, Кеңес ауылдық округіне қарасты Бөлтірік шешен ауылындағы Нұралы көшесіне орта жөндеу жұмыстары жүргізіліп, қалпына келтірілген. Бұған қоса Майтөбе ауылындағы Б.Момышұлы, Есейхан ауылындағы А.Омарұлы, Қараой ауылындағы Байжан, Қасқабұлақ ауылындағы Тамды әулие және Бейбітшілік, Тамды ауылындағы бірнеше көше мен Көктал ауылындағы Есейхан көшелерінің жол төсемі жөндеуден өткен. Жалпы алғанда аудан бойынша 52 көшенің жолы ретке келтірілген екен.
Жамбыл облысы,
Талас ауданы
