1883 жылы Париждегі Варьете театры сахнасында тұсауы кесілген қойылым елордалық театрда комедияға құрылған.
«Мадемуазель Нитуш» – мәңгілік махаббат тарихы. Спектакль өз көрермендерінің ықыласын тез баурады. Құдды махаббат ертегісіндегі бейнелерді көз алдымызға келтіргендей. Қойылымның музыкалық әрлеуі мен әртістердің ойын-сауық өнері де ерекше. Сондай-ақ француз киім-үлгісіне қазақы ою-өрнекті сабақтастыра отырып, екі мәдениетті байланыстыра алған. Осы орайда костюмдер бойынша суретшінің биік талғамын байқауға болады. Одан бөлек спектакльдегі нәзіктікті айрықша атап өтеміз. Флорин Эрвенің музыкаға деген шынайы махаббатын режиссер Алуа Сабо көркем сахналай алғаны да көрініп тұр.
Қойылымдағы аса нәзіктік пен сұлулық бойына тән ару Денизенің рөлін актриса Инабат Ризабекқызы ойнаса, оның ғашығы Лейтенант Шамплатроны Игілік Оразаұлы сомдады. Ал музыканы өмірінің мәні етіп, тіпті жүректен шығатын өнері үшін, басын тәуекелге тіккен басты кейіпкер Фларидордың рөлін актер Ернар Махамбет алып шықты. Аса ептілік пен энергияны бойларына жия білген жас әртістеріміздің таланты шарықтап келеді. Француз классикасының көркемдігі театр сахнасының ажарын аша алды. Ал оны лайықты түрде бағалай білген қауымның қошеметі мен ықыласы театрға үлкен серпін әкелгендей.
Дидар АСЫЛХАН,
Қожа Ахмет Ясауи атындағы Халықаралық қазақ-түрік университетінің 2-курс студенті
