Сурет Денсаулық сақтау министрлігінің сайтынан алынды
Дәрігерлер 36 жастағы пациентке көп түйінді эутиреоидты зоб (түйіннің мөлшері 5 см-ден аса) диагнозын қойған. Операцияны жүргізуге институт басшылығы Астана қаласы Ұлттық ғылыми медициналық орталығының интервенциялық онкорадиолог дәрігері Нияз Малаевты шақырған. Бірегей аз инвазивті операцияға клиниканың рентгенхирургтері мен эндокринолог дәрігерлері де қатысқан.
Түсініктірек болу үшін айтсақ, радиожиілікті абляция – ісік тініне әсер етудің заманауи әдістерінің бірі. Мұндағы мақсат – неоплазманы толық жою. Нәтижесінде, қалқанша безінің түйінді ісік жасушалары кетеді. Түйіннің көлемі кішірейеді, уақыт өте азаяды. Есесіне, осы кезде бездің сау тіндері зақымданбайды.
– Елімізде 2022 жылдан бері қолданылып келе жатқан радиожиілікті абляция әдістемесі қалқанша безінің қатерсіз түйіндік ісіктерін емдеуде жақсы нәтиже көрсетті. Тиімді әрі қауіпсіз. Қалқанша безінің түйіндерінің көпшілігі қатерсіз және симптомсыз. Бірақ үлкен түйіндер косметикалық проблемалармен қатар, мойын ағзаларының қысылу белгілерін, ауырсыну, дисфагия, ыңғайсыздық тудырып, тамақтың жыбырлатып, жөтел шақыруы мүмкін, – деп түсіндіреді Нияз Бейсенұлы.
Радиожиілікті абляция – асқыну жиілігі төмен қалқанша безінің қатерсіз түйіндерін емдеудің қауіпсіз әдісі. Оны әлемнің дамыған елдерінің көптеген кәсіби эндокринологиялық қоғамы ұсынады. Визуалдық ультрадыбыстық бақылаумен термиялық радиожиілікті абляция әдісі әлемнің дамыған елдерінде кеңінен қолданылады. Осы әдістен кейін пациенттердің өмір сүру сапасы жақсарады. Бір сөзбен айтқанда, радиожиілікті абляция – қалқанша безді хирургиялық жолмен алып тастауға тамаша балама. Емшара наркозды қажет етпейді. Тек қалқанша безінің қатерсіз түйіндеріндегі ауырсынуды бақылау үшін анестезия қолданылады екен. Емшарадан кейін аз-кем ауырсыну байқалғанымен, аса мазаны алмайды деседі. Емшарадан кейін Айнұр есімді пациенттің өзі радиожиілікті абляция туралы пікірін айтыпты.
– Дәрігерлерге барған кезде маған хирургиялық алып тастау ұсынылды. Бірақ мен одан бас тарттым. Радиожиілікті абляцияны дұрыс санадым. Емшарадан алдын маған қалқанша безінің цитологиялық зерттеуі жүргізілді. Оны ауырсынбадым. Қазір өзімді жақсы сезінемін және бүгін үйге шығамын. Мен дәрігер Нияз Бейсенұлына, Кардиология және ішкі аурулар ғылыми-зерттеу институтына, дәрігерлері Алексей Евгеньевичке, эндокринологтер Лаура Бахытжанқызы мен Балнұр Пердеқожақызына жоғары кәсібилігі үшін ризамын, – дейді алғысын айтқан пациент.
Қалқанша безінің қатерсіз түйінді ісігін аз инвазивті емдеудің инновациялық, жоғары тиімді әдістері қазір Алматы қаласындағы пациенттерге МӘМС аясында қолжетімді. Ғылыми-зерттеу институтының дәрігерлері осымен тоқтамай, келешекте қалқанша безінің қатерсіз ісіктерінің радиожиілікті абляциясын меңгерген мамандарды даярлаумен қатар, саланы одан әрі жетілдіруге ниетті.
