Биыл облыста 873,6 мың гектарға ауыл шаруашылығы дақылдарын егу жоспарланған. Өңірде суды аз қажет ететін өнім түрлерін егуге басымдық берілмек. Бұл орайда масақты дақылдардың егіс көлемі өткен жылмен салыстырғанда артып отыр. Дәнді дақылдар 335 мың гектар жерге, бұршақты дақыл – 3,8 мың, техникалық дақылдар – 105,3 мың, ал көкөніс 44,9 мың гектарға егілмек. Мақта мен майлы дақылдар өткен жылмен салыстырғанда 6,4 мың гектарға қысқартылып, сәйкесінше – 105, және 75,5 мың гектарға орналастырылады. Бүгінде ерте пісетін қырыққабат дақылы 0,5 мың гектарға егілді. Көктемгі дала жұмыстарын жүргізуге қолда бар техникалардың дайындығы – 95%, 21,8 мың тонна жанармай бөлінді. 1382 комбайн, трактор және қосымша құрал-жабдықтар сатып алынған. Жалпы облыста 24 мыңға жуық ауыл шаруашылығы техникасы бар. Жер айдау жұмыстары – 79, сор шаю жұмыстары 56 пайызға орындалған. Тауар өндірушілер жаздық дақылдардың тұқымымен толық қамтамасыз етілген. Егіске қажетті 7,8 мың тонна масақты дақыл, 1,5 мың тонна мақсары, 3,4 мың тонна мақта, 0,5 мың тонна жоңышқа және 0,9 мың тонна жүгері тұқымдары бар. Ал картоп тұқымдары коммерциялық ұйымдардан алынып жатыр. Облыс әкімдігінің мәліметіне сүйенсек, өңірде 500 түрлі минералды тыңайтқыш құнының 50%-ын субсидиялауға 7 млрд теңге бөлінген. Яғни 82,3 мың тонна минералды тыңайтқыш субсидияланады. Бүгінде облыс аумағындағы қоймада 25,0 мың тонна минералды тыңайтқыш сақтаулы. Сондай-ақ басым дақылдардың өндірісін дамытуды субсидиялау бағдарламасына республикалық бюджеттен қосымша 5 млрд теңге бөлу ұсынылған. Тұқым шаруашылығын қолдау бағдарламасына 600 млн теңге облыстық бюджеттен қаралған. Ағын су жеткізу құнын субсидиялауға 150 млн теңге бөлінді. Көктемгі дала жұмыстарын жүргізуге «Аграрлық несие корпорациясы» АҚ арқылы 13,4 млрд теңге қаржы бөлу жоспарланған. Оның ішінде «Кең дала» бағдарламасымен 10,0 млрд теңге, тікелей зауыттарға 2,5 млрд теңге және несие серіктестіктері арқылы 868,0 млн теңге бөлінеді. Нәтижесінде, 68,0 мың гектар алқаптағы дала жұмыстары қаржыландырылады.
Сондай-ақ облыста мақсатына сай пайдаланбаған және заңсыз жекешеленген жерлерді ортақ қорға қайтаруда ауқымды жұмыстар жүргізіліп, 330,7 мың гектар мемлекет меншігіне қайтарылды. Облыстың жалпы жер қоры – 11 610,3 мың гектар. Оның ішінде ауылшаруашылық мақсаттары санатындағы пайдаланатын жерлер 4 469,5 мың гектарға жетті. Елді мекендердің жерлері 800 мың гектардан асады. Облыстық жер қатынастары басқармасының басшысы Ерғали Тілегеннің баяндауынша, өткен жылы ауыл шаруашылығы мақсатындағы 131,8 мың гектар жер айналымға енгізілді. Былтыр ортақ жайылым қажеттілігі 2 122,2 мың гектардан асқан. Осыған орай, облыс әкімі Дархан Сатыбалдының тапсырмасына сәйкес ортақ жайылым көлемін 1015,0 мың гектарға ұлғайту жоспары бекітілген. Нәтижесінде өткен жылдың қорытындысымен 335 мың гектар ортақ жайылыммен қамтамасыз етілді. Жалпы ортақ жайылым қажеттілігінен 681,8 мың гектар төмендету бойынша ұйымдастыру жұмыстары жүргізіліп, 937 мың гектар төмендетілді. Ортақ жайылым көлемін ұлғайту мақсатында арнайы қордағы 125 мың гектар жер учаскелерін ауылдық округ әкімі аппаратына тұрақты пайдалануға беру жұмыстары жүргізіледі. Ауыл шаруашылығы мақсатындағы жерлердің үлесін ұлғайту жоспары бекітіліп, 146,9 мың гектар жерді қайта айналымға енгізу көзделіп отыр.
Түркістан облысы
