Ауғанстандағы соғыс ардагерлері мен мүгедектерін үйлестіру кеңесінің төрағасы Мұрат Әбдішүкіров 22 296 отандасымыздың Ауған соғысына қатысқанын, 929 адам қаза тауып, 19 адам хабар-ошарсыз кетіп, мыңдаған азамат мүгедек болып оралғанын атап өтті. Бес отандасымызға Кеңес Одағының Батыры, біреуіне Халық қаһарманы атағы берілсе, екі жауынгер «Айбын» орденімен марапатталған.
«Алматы әкімдігі ардагерлерді ұдайы қолдайды. 15 ақпан қарсаңында және 9 мамырға қарай интернационалист жауынгерлер 100 мың теңгеден алады. Ауған соғысының ардагерлері медициналық көрсеткіштері бойынша санаторий-курорттық ем алуға құқылы. Қазір квота жылына 170 жолдамаға дейін ұлғайтылды. Мұның бәрі бізге сол соғыс туралы, жерлестеріміздің ерлігін ұмытуға құқық бермейді. Өз батырларын құрметтейтін және мақтан тұтатын халық – ұлы халық», дейді М.Әбдішүкіров.
Атаулы күн қарсаңында Алматыда бірқатар ауқымды іс-шара өтпек. Атап айтсақ, 15 ақпан күні 28 гвардияшы-панфиловшылар саябағында Ауғанстанда қаза тапқан алматылықтарды еске алу мақсатында «Мәңгілік алау» монументіне гүл шоқтарын қою рәсімі өтеді. Қаланың барлық ауданында интернационалист жауынгерлерге құрмет көрсетіліп, әскери қоян-қолтық ұрыс шеберлерінің көрме қойылымдары мен әскери-патриоттық концерті ұйымдастырылмақ. Ал 14 ақпанда Орталық мемлекеттік музейде мерейтойлық күнге арналған көрме ашылады.
«Көк байрақ» қоғамдық бірлестігінің төрағасы Әуез Бейсенбаев, өткізілетін іс-шаралар жас ұрпақты тарихпен таныстыру үшін қажет екенін атап өтті. Сонымен қатар Алматы қаласының барлық оқу орнында жастардың бойында патриотизм сезімін ояту мақсатында «Ерлік сабақтары» өткізіледі. Ұйымдастырушылар қала тұрғындары мен қонақтарын іс-шараларға белсене қатысуға шақырды.
АЛМАТЫ
