Ғылым және жоғары білім министрлігінің хабарлауынша, «Қазына» орталығы институттың ғылыми-инфрақұрылымын кеңейту, білім алушылардың ғылыми-зерттеу жұмыстарына қызығушылығын тудыру және этномәдени-танымдық көзқарастарын жетілдіру, ғылыми-зерттеу жұмыстарының сапасы мен көкейкестілігін арттыру мақсатында ашылды. Сондай-ақ ғылыми-зерттеу, заманауи-тәжірибелік, ақпараттық қызмет бағыттарын қамтитын орталық та ізденушілер ұлттық тәрбие ісінің жетістіктерін нақты жағдайда пайдалануға үйренеді.
Орталықтың ашылуына Altynsarin institute-ның доценті, этнопедагогика пәнінен ұзақ жылдар бойы студенттерге дәріс оқыған зейнеткер-ұстаз Пернекүл Ахметова, облыстық Дала өлкесі тарихы мұражайының директоры Рауан Абдуллажанұлы, Ғылыми-зерттеу орталығының жетекшісі Жанар Байсеитқызы және институттың профессор-оқытушылар құрамы мен студенттері қатысты.
Ашылуында сөз алған ардагер педагог П.Ахметова: «Ұлт руханиятының аласармас биігін насихаттайтын орталықтың болашағынан үлкен үміт күтеміз. Білім алушы мен білім берушілердің ұлттық рух-жігерін ұштайтын, патриоттық сезіміне қозғау салатын, ұлағатты ой мен рухани қорек беретін алаңға айналатынына сенім білдіремін. Себебі біздің мемлекетімізге тек білімді азамат емес, отансүйгіш, ұлтжанды перзент керек. Болашақ ұстаздарды даярлайтын оқу орнында осындай орталықтың ашылғаны қуантады», деді.
Алдағы уақытта ата-бабадан қалған қазыналарымызды зерттеуге, зерттеулер нәтижесін педагогика мен психологияда пайдалануға бағытталған «Қазына» этнопедагогика және этнопсихология орталығының ұжымы Арқалық қаласының мәдени-ағарту ошақтарымен қоян-қолтық жұмыс істеуді жоспарлап отыр.
