Суретті түсірген – Ерлан ОМАР, «EQ»
Аяжан Даниярқызы бүгінде Қаныш Сәтбаев атындағы қазақ ұлттық зерттеу университетінің «компьютерлік ғылымдар» мамандығы бойынша 3-курста білім алып жүр. Аяжанның сабақтан тыс уақытта құсбегілік өнермен айналысып жүргеніне 2 жылдай уақыт болыпты.
Бұған дейін ол «Сұлтансері» этнографиялық орталығының әлеуметтік желілерге жариялаған садақшы қыздар кастингіне қатысып, сол жерде тәлімгері Сұлтансері Бекетұлының құстарға қамқорлығын көріп, қос қанаттыларға деген қызығушылығы пайда болған. Басында жай ғана ермек қылып жүрген ол кейін осы бүркітшілік жолды таңдады. Өйткені оны бүркіттің адамға деген бауырмалдылығы, сенімділігі, қырағылығы мен күштілігі ерекше таңғалдырыпты. Жаттығу кезінде алғашқы бүркіттердің бірі Аяжанға қатты бауыр басып қалғаны соншалық, тек соның ғана бұйрығын тыңдап, кейде тіпті өз иесіне де бағынбайтын болған.
Кейіпкеріміз құсбегілік өнер арқылы елімізде ұлттық спорттың осы түрін мықтап қолға алуды жоспарлап отыр. Тіпті ол өзінің бұл өнері туралы сағаттап әңгімелеуге бар. Осы күнге дейін Аяжан екі құсты баптап үлгерген. Жыл бойы бірнеше рет бүркітшілер сайысында алғырлығымен көзге түсіп, финалға дейін жетті. Қазір қыран баптаған қыз республикалық турнирде жеңімпаздар қатарынан көріну үшін барын салып, қызу дайындалып жатыр.
