Көрменің басты ерекшелігі – қылқалам шеберлері көктем мерекесі қарсаңында арнайы салынған, сиясы кеппеген жаңа шығармаларын көрермен назарына ұсынды. Павлодар, Өскемен, Тараз, Шымкент, Астана қаласының суретшілері атсалысқан көрмеге 100-ге жуық шығарма қойылған. Сондай-ақ отандық қолөнер шеберлерінің биік талғамынан туған ұлттық нақыштағы қуыршақтар да көрермен көзайымына айналды.
Экспозицияда Майса Ықласова, Полина Крутова, Анна Петракова, Елена Панина, Лаура Сатпаева, Елена Попова, Ержан Бұхарбаев, Күмісай Шарипова, Гауһар Жүнісова, Салтанат Жапарова, Айгерім Орал, Толқын Қалимова, Атабек Бекболатов сынды суретшілер мен қолөнершілердің қолтаңбасы бірден көзге түседі. Отандық сурет өнерінің алуан түрлілігі мен тереңдігін көрсететін ауқымды іс-шара Наурыз мерекесіне орай ұйымдастырылған.
– Көктем мені айналаның бәріне ғашық етіп жыл сайын гүл боп оралады. Бұл сезімді көкірегімде мәңгілік сақтап қалғым келеді. Бала кезден көңілім айналамдағы бояуларды ерекше әсермен қабылдайды. Аялдамадан басталатын қала тіршілігі тұнжыраған ауа райымен қосылып мені бейжай қалдырмайды. Тіршілік тынысы көңілімдегі сезім тереңдігінде бояу тілімен үн қатып ақ қағазға түскенше жанымды арпалысқа салады. Жаным айналадағы әлемнен өзгеше үйлесім іздейді. Бүкіл көңіл күйімді жан-дүниемді өнер арқылы сыртқа шығарамын. Бұл барлық суретшіге тән сезім шығар. Адам өмір бойы өзіндегі кемшіліктерімен күресіп оны жеңе білуі шарт. Дарының болса да оны тәрбиелеп, шыңдау керек. Еркін ойлы адам ғана өнерде жасампаздыққа қол жеткізеді, – дейді суретші Анар Әбжанова.
АЛМАТЫ
