Мәселен, осы жылдың басынан бері елді мекендерден 3,7 мың текше метр қар шығарылған. Сондай-ақ 244 шақырымды құрайтын арық желілері, 108 шақырым арналар мен автожолдардың астындағы 139 бірлік және теміржолдардың астындағы 7 бірлік су өткізу құбырлары, 65,7 шақырым су бұру каналдарының құрылысы тазартылған. Су тасқыны орын алған жағдайда жалпы саны 1 326 адам, 471 бірлік техника, 126 мотопомпалар, 29 бірлік жүзу құралдары мен 35 460 қапшық қарастырылған, облыстың азаматтық қорғау қызметтерінің күштері мен құралдарының топтамасы құрылып, көмек қолын созуға сақадай сай.
Десе де, апат айтып келмейді. Күні бұрын Қонаев қаласына қарасты Қосқұдық аулында ауа температурасының жоғарылауына байланысты төтенше жағдай орын алып, 5 тұрғын үйдің ауласын су басқан. Ауылдың солтүстік-батыс бөлігін егістік пен жазық жерлерде еріген қар суы басқаны туралы хабарлама алған облыстық төтенше жағдайлар департаментінің қызметкерлері дереу іске кірісіп, қарғын судың одан әрі жайылмауына тосқауыл болды.
«Қосқұдық аулындағы Түрксіб көшесінде бес тұрғын үйдің ауласына су кірген. Осы көшеде 30 аула бар. Төтенше жағдайлар департаменті мен жергілікті атқарушы органдардың күштері бірлесе инженерлік техниканың көмегімен арық қазылып, еріген суды бұру жұмыстары жүргізілді. Қауіпті сейілту жұмыстарына ТЖД-ның 30 қызметкері, бес техникасы мен үш мотопомпасы, жергілікті атқарушы органдардан төрт адам және техника жұмылдырылды. Зардап шеккендер жоқ. Осы уақытта тұрғын үйлерді су басу қаупі жойылды», дейді Қонаев қалалық төтенше жағдайлар басқармасының бастығы, полковник Мұрат Сыдықов.
Алматы облысы
