Ұйымдастырушылар әуесқой фотографтарға да, өз ісінің кәсіби мамандарына да бірдей шарт қойған. Әр қатысушының 3 фотодан ұсыну мүмкіндігі болды. Ал сайыс қорытындысына дейін онлайн форматта, елдің барлық өңірінен 500-ге жуық жұмыс келіпті. Құрамына партия басшылығы мен тәжірибелі фотографтар енген қазылар алқасы туындыларды тақырыпқа сәйкестігі, жұмысты бере білудегі жаңашылдығы, көңіл күй және басқа да талаптар негізінде іріктеген. Сонымен қатар қазылар «Әлеуметтік желідегі жүлдегер» сияқты арнайы сыйлық тағайындау жөнінде шешім қабылдап, іріктеу партияның Telegram каналында ашық дауыс беру арқылы жүргізіліпті. Мұнан өзге еңбек адамының қоғамдағы мәртебесін көтеру мақсатында тағайындалған «Ауыл еңбеккерінің бейнесі» арнайы сыйлығының иесі де келген фотолар арасынан таңдап алынды.
Іс-шараға Мәжіліс депутаттары, Ауыл шаруашылығы министрлігінің, Астана қаласы Мәдениет басқармасының басшылығы, дипломатиялық миссия өкілдері, жоғары оқу орындарының профессорлық-оқытушылық құрамы, шығармашыл зиялы қауым мен жастар қатысты.
«Фотосурет арқылы біз әдеттегі дүниелерді жаңа призма арқылы көру мүмкіндігін алдық. Қызығы мен қиындығы қатар жүретін ауыл тұрғындарының тіршілігін сол қалпында көрсете білген әр қатысушыға алғыс білдіреміз. Жыл санап байқауға қатысушылар саны артып келеді. Биыл 122 адам қатысып, байқауға 500-ге тарта туынды ұсынылды. Бұл өз кезегінде фотография өнерінің әуесқойлары мен кәсіпқойлары арасында аталған конкурстың маңыздылығын көрсетеді», деді салтанатты шараны ашқан «Ауыл» партиясы төрағасының бірінші орынбасары Төлеутай Рахымбеков.
Байқау қорытындысында сөз алған халықаралық «National Geografic» журналының жауапты редакторы Айбын Шағалақ пейзаж, репортаждық түсірілім, деректі фотография, портретистикамен айналысатын фотографтар үшін ауыл тақырыбының қызықты екенін айтып, осы өнерге шын берілген адамдарды қолдағаны үшін «Ауыл» партиясына алғыс білдірді.
Байқау нәтижесінде І орынды Серік Майемеров (Маңғыстау облысы) жеңіп алса, ІІ орынды Нұрболат Нұржаубай (Қызылорда облысы), ІІІ орынды Береке Сейтжаппар (Шымкент қаласы) иеленді. «Ауыл еңбеккерінің бейнесі» сыйлығы «Egemen Qazaqstan» газетінің фототілшісі Ерлан Омаровқа (Астана қаласы), «Әлеуметтік желідегі жүлдегер» сыйлығы Жазира Қарымсақоваға (Абай облысы) табысталды.
«Барлық берекенiң бастауы – ауыл. Сондықтан ауыл нақыштарын дəрiптейтiн мұндай бастамаларды ерекше қолдаймын. Бiрге атсалысуға тырысамыз. Аулымыз кɵркейе берсiн», дейді жүлдегер Нұрболат Нұржаубай.
Марапаттау рәсімінен соң, сауда ойын-сауық орталығы фойесінде «Ауыл нақыштары» фотокөрмесі ашылды. Мұнда ауыл бейнесін бедерлеген 50 фотоны Астана тұрғындары мен қонақтары тамашалады.
