Фото: old.syrboyi.kz
Жаңа үлгі – барлық азамат үшін экономикалық мүмкіндіктер мен нәтижелерде теңдікті қамтамасыз етудің бастамасы. Инклюзивтілік қағидасы экономикалық дамудың қоғамның барлық тобына, соның ішінде маргиналды және осал топтарға да ықпалын тигізеді. Прагматикалық көзқарас экономикалық саясат пен реформаға нақтыланған тәжірибелік және шынайы тәсілдерді қабылдауды көздейді. Жаңа экономикалық үлгінің халықтың әл-ауқатын арттыруға бағдарлануы ел тұрғындарының өмір сүру сапасын жақсартуға әсер етеді.
Мемлекет басшысының Қазақстан халқы Ассамблеясының қызметін жаңа гуманитарлық-идеологиялық доктринамен үйлестіруге ерекше мән беруі ұлттық саясат пен мақсаттардың стратегиялық үйлесімділігін көрсетеді. Гуманитарлық доктрина азаматтардың әл-ауқаты, құқықтары мен қадір-қасиетін ілгерілетуге бағытталған қағидаттар мен саясатқа қатысты мәселе. Бұл мәселе әлеуметтік қызметтерді жақсарту, халықтың осал топтарын қорғау және барлық азаматтың негізгі қажеттіліктерін қанағаттандыруды қамтамасыз ету жөніндегі бастамаларды қамтиды. Ассамблеяны осы доктринаның гуманитарлық қағидасымен сәйкестендіру гуманитарлық мәселелердің күн тәртібінде жоғары тұруын қамтамасыз ете алады.
Идеологиялық доктрина әдетте ел мен қоғамды басқаруға басшылық жасайтын негізгі сенімдер, құндылықтар және қағидаларды сипаттайды. Ұсынылған жаңа идеологиялық доктрина Қазақстанның ұлттық құндылықтары мен басымдықтарын жаңа жағдайларға сәйкес нақтылауды қажет етеді, отансүйгіштік, мәдени мұра, экономикалық даму және еліміздің жаңа бағытын қалыптастыратын өзге де жетекші қағидаларға назар аударуға шақырады.
Қазақстан халқы Ассамблеясы сессиясындағы бірлік, жасампаздық пен өрлеу тұжырымдары алға қойылған мақсаттарға қол жеткізуде шығармашылық пен инновацияны ынталандыру және прогрессивті ұлт ретінде жетістіктерге жетуде ұлттық бірліктің маңыздылығын көрсетеді. Президенттің осы салаларға назар аударуы еліміздің алдында тұрған негізгі мәселелерін, ұзақмерзімді даму мақсаттарын шешуге кешенді көзқарасты білдіреді. Еліміздің тұрақты, инклюзивті және гүлденген болашағы туралы көзқарасты айқындайды.
Мұрат НАСИМОВ,
Қызылорда облыстық ҚХА жанындағы ғылыми-сарапшылық тобының мүшесі
