Осыған орай Астанада жазғы спорт түрлерінен паралимпиадалық жаттығу орталығының ауқымы кеңейеді. 2018 жылы Астанада ашылған жазғы және қысқы паралимпиада спорт түрлерінен ұлттық құрамалар мен спорттық резервтерді кәсіби даярлауға арналған нысан биыл жаңа спорт алаңдарымен толықтырылмақ. Мүгедектігі бар адамдарға арналған мұндай орталықтар АҚШ, Ұлыбритания, Жапония, Оңтүстік Кореяда бар.
Аталған жобаға Қазақстан Ұлттық паралимпиада комитетінің президенті Қайрат Боранбаев қаржы бөлмек және бұл бірегей спорт нысаны ғана емес, сондай-ақ ерекше қажеттілігі бар адамдарға арналған жабдықтарға қызмет көрсету орталығы болмақ.
«Орталықта отырып ойнайтын волейбол, баскетбол, бочча және арбадағы регби, голбол, арбадағы тенниске арналған спорт залдары бар. Ғимараттың жалпы ауданы 3431 шаршы метрді құрайды, спорт залдарының көлемі 48/26 метрге дейін жетеді. 2020 жылы УЕФА жобалық құжаттаманы әзірлеуге 45 мың еуро бөлген, бұл жобаның спорт қауымдастығы үшін маңызды екенін көрсетеді», деді Ұлттық паралимпиада комитетінің президенті.
Орталық адамдардың физикалық мүмкіндігіне қарамастан барлығына қолжетімді болатын арнайы көтергіштермен және лифтілермен жабдықталады. Жобаға УЕФА президенті Александр Чефериннің өзі қолдау білдірген.
«Мұнда қызмет ететіндер де, жаттықтырушылар да – ерекше қажеттілігі бар жандар. Мұның бәрі олардың бірін-бірі жақсы түсініп, қоғам өміріне еркін араласуы үшін қажет. Мүгедектігі бар кез келген адам осында келіп тегін жаттыға алады. Мұндағы арнайы медициналық кабинет келушілердің денсаулығын тексеріп, кімге қаншалықты жүктеме беруге, қандай спорт түрімен шұғылдануына болатынын анықтайды. Спорт нысанындағы баспалдақ пен пандустан бастап жарық жағу нүктелеріне дейін мүгедек жандардың жағдайына қарай жабдықталған. Барлығы халықаралық талаптарға сай», деді аталған комитеттің бас хатшысы Олжас Ақпамбетов.
Оның айтуынша, Астанадағы жаңа паралимпиадалық орталық – жай ғана спорт нысаны емес, ерекше қажеттілігі бар адамдардың әлеуметтік дамуы үшін бірегей алаң. Паралимпиадалық орталық болашақта әлемдік чемпионаттар мен халықаралық жарыстар өткізуге ниетті. Сондай-ақ білім жүйесін әлемдік деңгейге жеткізу жоспарда бар.
«Орталыққа 2021 жылы ота жасатқаннан кейін келдім. Маған қалқанша безінің қатерлі ісігі диагнозын қойды. Бәрі енді толыққанды өмір сүре алмайсың деді. Мен сол сәтте өмірден күдерімді үздім, салым суға кетті. Көп кешікпей осы орталыққа келдім. Паралимпиада орталығы мені өмірге қайта алып келгендей болды. Бүгінде үстел теннисінен біраз жетістікке жеттім. Республикалық, қалалық жарыстардың бірнеше дүркін жеңімпазы атандым. Сондай-ақ халықаралық контенторға төрелік етемін. Бұл – бір кезде өмірден күдер үзген мен үшін үлкен жетістік», дейді 51 жастағы паралимпиадашы Ольга Корх.
Жуырда Астанада 2024 жылы Парижде өтетін паралимпиада ойындарына 100 күн қалғанда Қазақстан мен Бразилия арасында волейболдан жолдастық кездесу өтіп, құрама командамыз тағы бір белесті бағындырды.
«Волейболдан құрама команданың көрсеткіші жаман емес. Қазір Франция командасымен жолдастық кездесуге дайындалып жатырмыз. Одан кейін Мысыр командасымен бақ сынасамыз. Бұрын волейболдан паралимпиадаға 12 команда қатысса, қазір іріктеуден өткен сегіз команда ғана қатысады», дейді волейболдан паралимпиада командасының жаттықтырушысы Бауыржан Тахауов.
Ал blind футбол дегенді естуіңіз бар ма? Бұл – нашар көретін адамдарға арналған футбол түрі. Осы орталықта көзі мүлде көрмейтін спортшылардан құралған футбол командасы бар.
«Менің туғаннан көру қабілетім төмен. Уақыт өте келе көруім тіпті қиындай түсті. Осы орталыққа келгенше өзімді қоғамнан бөлек, кем сезінетінмін. Спорт мүмкіндіктердің шексіз екенін көрсетті. Команданың ойнына сырттан қарап тұрған адам біздің зағип екенімізге сенбейді. Қазір әйелім, тәрбиелеп отырған екі балам бар. Алға қойған жоспарымыз, мақсатымыз көп», дейді футболшы Қанат Ақынбаев.
Паралимпиадалық орталық – әлемдік чемпионаттар мен халықаралық жарыстар өтетін орын, сондай-ақ әлемдік деңгейдегі білім орталығы болады деп жоспарланып отыр. Алда орталықтың жанынан тағы да бір құрылыс нысаны салынады. Құрылыс құны – 4,2 миллиард теңге, ашылуы 2026 жылғы 1 тамызға жоспарланғанын айтады орталық қызметкерлері.
