21 жастағы Өсербей Ақан биыл күзде оралуы тиіс еді. Айдың-күннің аманында ұлымыздан айырылдық деген сарбаздың туыстары оқыс оқиға болды дегенге сенбейді.
Өсербай Ақан Алматы облысы Қарасай ауданының тумасы. Үйінде баланың үлкені. Былтыр күзде Отан алдындағы борышын өтеуге Аягөз қаласына кеткен. Марқұмның туған-туыстары баласының денесі техниканың астында қалғанына сенбейді.
– Баламды көруге менің айғайыммен, ұрсуыммен әрең кірдік. Жалғыз өзімді мәйітханаға кіргізді. Көрдім. БТР-дың астына түсіп қалған дейді. Білмеймін. Балам сол қалпында жатыр. Егер де сондай ауыр техниканың астына түсіп қалса, езіліп қалмай ма? – дейді марқұмның анасы Бану Ақанқызы 31 арна тілшілеріне.
Айта кетейік, бұған дейін Қорғаныс министрлігі таратқан мәліметте оқу-жаттығу барысында қауіпсіздік ережелерінің сақталмауына байланысты Аягөз гарнизонындағы әскери бөлімдердің бірінің мерзімді қызметтегі әскери қызметшісі жарақат алып, көз жұмғаны айтылғаны хабарланған еді. Қорғаныс министрлігі аталған факті бойынша қызметтік тексеріс тағайындалып, қылмыстық іс қозғалғанын, кінәлі және лауазымды тұлғалар қылмыстық кодекс және тәртіптік жарғы аясында тиісті жауапкершілікке тартылатынын хабарлаған.
