Оның аясында ірі компаниялардың өкілдері университет студенттеріне 25 млн теңгеден астам қаржыға атаулы гранттар мен стипендиялар тағайындады. Салтанатты іс-шарада еліміздегі 4 жоғары оқу орындарының үздік студенттері де елордада ерекше үлгідегі дипломдарын қолға алды.
Астана медицина университеті - Қазақстанда дәрігерлерді дайындау бойынша көшбасшы. Жыл сайын оқу ордасының 1000-нан астам жас маманы еліміздің медициналық мекемелеріне жұмысқа орналасады.
Биыл Астана медицина университетінің 1200-ден астам қазақ және шетел студенттері оқуларын сәтті аяқтады және жұмысқа кірісуге әзір. Оқу ордасында Үндістан, Пәкістан, Моңғолия, Ресей, Өзбекстан және Иорданиядан келген жас мамандар білім алды. Түлектер интернатура мен бакалавриат деңгейінде 7 бағыт бойынша білім алды: «Жалпы медицина», «Стоматология», «Фармация», «Қоғамдық денсаулық сақтау», «Мейірбике ісі», «Кинезиотерапия» және «Эрготерапия». Олар тәжірибелік дағдыларын үздік емханалар мен медициналық орталықтарда шыңдап, әлемнің жетекші университеттерінде шетелдік тәжірибені зерделеуге мүмкіндік алды.
«Сіздер бірнеше жыл бұрын Медициналық университетке түсіп, маңызды таңдау жасадыңыздар. Бүгін бұл қадамның саналы және дұрыс екенін дәлелдедіңіздер! Біздің оқытушылар сапалы білім алу үшін барлық қажетті жағдайларды жасап, бойларыңызға адалдық пен кәсібилікті сіңірді! Алдағы уақытта сіздер адамдарға қызмет ету және науқастардың денсаулығына қамқорлық жасау деген жауапты миссияға кірісесіздер. Ақ халаттың абыройын сақтап, біліктілік пен білімді үнемі шыңдау маңызды», деп атап өтті өз сөзінде оқу орнының ректоры Қамалжан Надыров.
ҚР Денсаулық сақтау министрі Ақмарал Әлназарова түлектерді құттықтап, жас мамандарға қолда бар жетістікті одан әрі дамыту, заманауи технологиялар мен тәжірибелерді енгізу, медициналық көмектің сапасы мен қолжетімділігін жетілдіру қажеттігін атап өтті.
Жас мамандарға «AMANAT» партиясының атқарушы хатшысы Дәулет Кәрібек, белгілі медицина қайраткерлері, кәсіпкерлер, ұлттық ғылыми орталықтар мен медициналық мекемелердің басшылары, университет оқытушылары өз тілектерін білдірді.
«Orbis Qazaqstan», «Sensata Group», «G-Park», «MIT» компанияларының өкілдері АМУ білім алушыларына 25 млн теңгеден астам сомаға атаулы гранттар мен стипендиялар тағайындады. Кәсіпкерлер жеке қаражаттарын дарынды және мұқтаж студенттерді қолдау үшін «AMU Endowment Development Fund» аударды.
Салтанатты іс-шара барысында Қарағанды медицина университетінің, С.Ж. Асфендияров атындағы Қазақ ұлттық медицина университетінің, Семей медицина университетінің, М. Оспанов атындағы Батыс Қазақстан медицина университетінің 17 үздік түлегіне де Астана қаласында дипломдар табысталды.
Әсет Жарылқапов интернатурада оқуын аяқтап, жалпы дәрігерлік практика бойынша дипломын қолына алды. Жас маман бала күнгі арманын орындап, хирург болуды ұйғарды.
«Бүгін мен үшін тебіреніске толы күн. Астана медицина университеті маған көптеген мүмкіндіктер ашып, дүниетанымымды кеңейтті. Тәжірибелі оқытушылардың арқасында заман талабына сай білім алып, шет тілін меңгеріп, оқу барысында ағылшын тілді топқа ауысуға мүмкіндік берілді. Бір жыл бойы Еуропада шеберлігімді шыңдадым. Нефрология, радиология, хирургия салалары бойынша халықаралық және республикалық олимпиадаларда 8 жүлделі орынға ие болдым. Енді мен хирургияны таңдап, оқуымды одан әрі жалғастырамын», дейді АМУ түлегі Әсет Жарылқапов.
«Астана Опера» Мемлекеттік опера және балет театры үшінші жыл қатарынан Астана медицина университетінің түлектеріне диплом тапсыру рәсімін тегін өткізу мүмкіндігін ұсынып отыр.
Атап өткен жөн, биыл университетің негізі қаланғанына 60 жыл толады. Осы уақыт аралығында еліміздің жетекші университеті денсаулық сақтау саласы үшін 30 мыңнан астам жоғары білікті мамандарды дайындады. Университет уақыт талабы мен қоғам сұранысына сай оқу-тәрбие үрдісін үнемі жетілдіріп келеді.
