Жобаның бас демеушісі – Қордағы компаниялар тобының бірыңғай қайырымдылық операторы – «Samruk-Kazyna Trust» өкілдері елордадағы қорытынды шарада жобаның екінші кезеңіне қатысу бақыты бұйырған 200 баламен жүздесті. Өз кезегінде, әсерлі сапардан оралған жас саяхатшылар туған елінің сұлулығына, оның тарихына бойлап, қанығуға, достар табуға және жаңа білім алуға берілген мүмкіндік үшін ұйымдастырушылар тарапына шын жүректен алғыс білдірді. Балалардың тең жартысы Қордың шалғай аудандардағы өндірістік кәсіпорын қызметкерлерінің балалары болса, қалған бөлігі су тасқынынан зардап шеккен ауылдардағы көпбалалы және тұрмысы төмен, толық емес отбасылардағы балалар. Сонымен қатар жобаның тәрбиелік-мазмұндық жағына Президент жанындағы Әйелдер істері және отбасылық-демографиялық саясат жөніндегі ұлттық комиссия атсалысқанын атап өткен абзал.
Саяхатқа ең көбі Атырау облысынан – 93,Солтүстік Қазақстан облысынан – 35, Батыс Қазақстан облысынан – 35, Ақтөбе облысынан – 40, Қостанай облысынан – 27, Ақмола облысынан – 32, Қарағанды облысынан – 20, Ұлытау облысынан – 4, Маңғыстау облысынан – 21, Қызылорда облысынан – 9, Шығыс Қазақстан облысы мен Абай облысынан – 28, Алматы облысынан – 22, Түркістан облысынан – 10, Павлодар облысынан – 14, Жамбыл облысынан – 9, Шымкент қаласынан 1 бала қатысты.
«Көптеген қызықты жерді аралап, жаңа нәрселерге қанықтық. Еліміздің табиғаты да, адамдары да тамаша екеніне көзіміз жете түсті. Балалардың көбі ауылдарынан алғаш рет осындай сапарға шығып отыр. Сондықтан сіздер балалардың арманын орындадыңыздар», дейді жобаға Павлодар облысынан қатысқан Асанәлі мен Нұрәлі Әділбек.
Сонымен қатар қатысушылар «Таза Қазақстан» жалпыұлттық акциясына үн қосып, сапар бойы экологиялық өмір салтын қалыптастырды. Өздері болған қалаларда 200 килодан астам тұрмыс қалдығын қайта өңдеуге тапсырды. Экология тақырыбында шеберлік шарасы өткізіліп, мектеп жасындағы жас саяхатшылар қоқысты дұрыс сұрыптауды, әрі қарай қалай кәдеге жарату керектігін үйренді. Бұл ретте вагондарға тұрмыс қалдығы түрлеріне байланысты арнайы контейнерлер орнатылды.
35 мың ауыл тұрғыны тегін медициналық-құқықтық көмек алды
Бүгінде Қор қолдауымен нағыз халықтық жоба – «Саламатты Қазақстан» медициналық пойызы Маңғыстау, Атырау, Ақтөбе, Батыс Қазақстан мен Қостанай облыстарының шалғайдағы тұрғындарына шарапатын тигізді. Қазіргі таңда пойыз ұжымы сапарын Ақмола және Солтүстік Қазақстан өңірлерінде жалғастырып жатыр.
34 331 азаматты (оның ішінде 10 051 бала) ақысыз медициналық қызметпен қамтыған дәрігерлер еңбегінен тыс, медиатор мен заңгер 1 811 арызды қарастырып, жергілікті азаматтардың құқықтық, еңбек кикілжіңдерін шешуге күш салды. Мәселен, СҚО-да пойыздағы әйелдер дәрігеріне жүгінген 18 жастағы қыз баланы ультрадыбыстық тексеру барысында жатырдың болмауына байланысты сирек кездесетін диагноз қойылып, науқасқа қосымша қаралуға кеңес берілді. Бұл ретте құрамдағы ақ халаттылар барлық нәзік жанды денсаулығына жауапкершілік танытып, жоспарлы тексерістерден уақтылы өтуге шақырады. Ақкөл стансасында пойыз заңгерлері үй құжаттары бойынша басында дау туындаған тұрғынға сотқа меншік құқығын рәсімдеу жөнінде арыз жазуға, барлық қажетті құжатын реттеуге көмектесті.
Сондай-ақ Мәдениет және ақпарат министрлігінің қолдауымен ірі стансаларда қайырымдылық концерті өтіп жатыр. Осыған дейін республикалық деңгейдегі әртістердің өнер көрсетуімен концерттер Ақмола мен Қостанай облыстарында ұйымдастырылды.
Шекаралас аудандарға демеу
Шығыс Қазақстан облысының Катонқарағай мен Зайсан аудандарында Қор қолдауымен екі бірдей спорт алаңы қолданысқа берілді. Әлеуметтік жобаның бұқаралық спортты дамытудан бөлек, стратегиялық және идеологиялық маңызы зор.
Аудандарда алғаш рет бой көтерген спорт алаңдарын халық көптен күтті. Енді аталған нысандарда 20 мыңнан аса тұрғын саламатты өмір салтын ұстанып, түрлі турнир өткізуге мүмкіндік алып отыр.
Алаңдардың әрбірінің жалпы аумағы 1,6 мың шаршы метрді құрайды. Онда жасанды көгалмен көмкерілген аумағы ұзындығы – 40, ені 20 метр болатын футбол және ұзындығы – 24, ені 16 метр болатын баскетбол алаңдары, толықтай құрылғылармен қамтылған воркаут аймағы бар. Алаңның жан-жағы қоршалып, абаттандырылады. Айта кетейік, ашылудан соң шағын футболдан турнир өтті. Игілікті іске мұрындық болып келген Мәжіліс депутаты Ерлан Саиров пен Қазақстан футбол федерациясының президенті Әділет Барменқұлов «Самұрық-Қазына» АҚ компаниялар тобының бастамасына жоғары баға берді.
«Шекаралас аймақтардың инфрақұрылымын дамыту маңызды. Ел болашағы жастардың бойында мемлекеттік, ұлттық рухты қалыптастыруымыз керек. Соның бір тетігі – спортқа баулу. Бүгінде «Samruk-Kazyna Trust» қоры екі ауданға бірдей спорт алаңдарын салып беріп отыр», атап өтті Ерлан Саиров.
«Samruk-Kazyna Trust» КҚ баспасөз орталығы
