Абай облысының кәсіпкерлер палатасының ұйымдастыруымен аймақтағы бизнес-қауымдастық өкілдерінің басын қосып отырған бұл шараға қатысушылардың өнімін әділ қазылар алқасы бағалап, шешім шығарады. Қазылар тарапынан және жоғары сұранысқа ие болған тауар өндірушілер алдағы уақытта мемлекеттен грант алып, өз кәсібін көркейтуге жол ашады.
«Бір ауыл – бір өнім» көрме-жәрмеңкесі биыл екінші рет өтіп жатыр. Аталған шараның аясын кеңейту арқылы ауыл тұрғындарының кәсіпкерлік әлеуетін арттыру, қарапайым азаматтардың әл-ауқаты мен өмір сүру деңгейін жақсарту мақсатында жаңа кәсіпкерлер мен кәсіпорындардың санын арттыруға мүмкіндік туады. Осы көрмеге келген және қазылар алқасының шешімімен үздік деп танылған жеке кәсіпкерлер болашақта өз өнімдерін экспорттауға, нарықта өз орнын табуға біздің тарапымыздан қолдау көреді. Бұл жоба ісін жаңадан бастаған кәсіпкерлердің өсуіне трамплин ретінде қызмет етеді. Қатысушылардың арасында шағын бизнес субъектілері де, жеке тұлғалар да бар», деді салтанатты шараның ашылу рәсімінде сөз алған Абай облысы кәсіпкерлер палатасының директоры Мақсат Әнуарбекұлы.
Көрме қорытындысы бойынша 10 кәсіпкер жартылай финалға шығады. Олардың бизнес жобалары өңірлік бренд комитетінің отырысында қаралып, нәтижесінде үздік үш жоба республикалық және халықаралық көрмелерде бақ сынап, бес миллион теңгеге дейін мемлекеттік грант алу мүмкіндігіне ие болады. Бұған қоса үздік деп танылған жоба иегерлері Абай облысының кәсіпкерлер палатасының қолдауымен маркетинг саласынан хабар алып, электронды коммерция бойынша тренингтер мен өнімді жақсарту, тауар пайдаланушыларын тартатын тартымды логотип әзірлеу, қаптама жасау бойынша әдіс-тәсілдерді игеріп шығады.
Мемлекетік гранттан үмітті жандардың бірі «Керім» атауымен тіркелген жеке кәсіпкер Мақсат Көшербаев осы көрмеге Ақсуат ауданынан арнайы келіпті. Ауыл шаруашылығы қалдықтарынан отын дайындайтын оның өнімі көрме қонақтарының қызығушылығын тудырды. Кәсіпкер сөзінше алдағы күнде көмірді алмастыратын бұл отынды дайындау үшін арнайы автоматтандырылған қалыптар керек екен. Егер мемлекеттік қолдау болса, жұмысшы тартып, пайдалы отынның өнімділігін арттырғысы келетінін айтты.
«Бала күнімнен бері темір ұстасы ретінде қызмет еттім. Сондықтан малдың тезегі мен қора-жайдың айналасындағы қалдықтарды іске жарату үшін арнайы қалып ойлап табу қиынға соққан жоқ. Бұл ой маған қоқыс полигондарына тасталатын және ауыл-аймақта өртеліп жататын қоқыстарды көргеннен кейін келген еді. Бастапқы кездері шөп-шалам қалдықтарынан осындай отын жасау керегін түсініп іске кірісіп кеттім. Бізде қазір «Таза Қазақстан» экологиялық акциясы жүріп жатыр, қоқыс полигонындағы заттарды осылай пайдаға жаратуды ойласақ, онда күн сайын қымбаттап жатқан көмірді алмастыратын осындай отын керек-ақ», дейді ауылдағы ауласынан басталған кәсібін көпшілікке таныстырған жеке кәсіпкер Мақсат Көшербаев.
Сонымен бірге ұлттық тағам дәстүрін жалғастырушы ретінде өз өнімдерін ұсынған Жарма ауданының тұрғыны Айгүл Ерғалиқызы осы көрме-жәрмеңкеге шұжық өнімдерін әкелген. Аз ғана уақыттың ішінде өздері тұратын Қалбатау ауылы жұртшылығының сұранысын тудырған өнімдерді алдағы уақытта цех ашып, кәсібін ұлғайтуды мақсат тұтыпты. Осы секілді ет өнімдерімен айналысатын Семей қаласының тұрғыны Меруерт Нұржанқызы да ежелгі дәстүр бойынша етті ыстап, шұжықтың әр түрін шығарып келеді. Бүгінде қоластында үш жұмысшы бар іскер әйел келешекте үлкен кәсіпорын болып құрылуды қалайды. Ауыл кәсіпкерлері мен өнімдерінің көрме-жәрмекесін ұйымдастырушылар алдағы уақытта аталған кіші бизнес өкілдерінің өркен жаярына сенімді.
Абай облысы
