«Гежуба Шиелі цемент компаниясы» ЖШС – еліміз бен Қытай Халық Республикасының бірлескен және индустрияландыру картасына енген Сырдағы ірі жобалардың бірі. Осыдан 6 жыл бұрын индустриялық-инновациялық даму бағдарламасы аясында ұйымдастырылған жалпыұлттық телекөпірде іске қосылған өндіріс орнының жобалық құны – 64 млрд теңге. Қазір жылына 1 млн тоннадан астам өнім шығарып отыр.
Жобаға мемлекеттік қолдау шаралары ретінде индустриалды аймақтан 46 гектар, жатақхана салу үшін 4 гектар жер телімі табысталған. Құрылыстан бөлек, мұнай, газ, уран ұңғымаларында кеңінен қолданылатын тампонажды цемент өндірісі өңірде осылай бастау алды.
«Компания түрлі инвестициялық жеңілдіктерді пайдаланды. Инвестициялық келісімшартқа отыру арқылы құрылғыларды алып келуде баж салығынан, аяққа тұрып кеткенше корпоративтік табыс салығынан, жер және мүлік салығынан босатылды. Кәсіпорын аудандарда да ірі жобаларды жүзеге асыруға болатынын көрсетті. Алғашқы өнімін шығарғаннан бастап іркіліссіз жұмыс істеп келе жатқан зауыт аймақты толық қамтамасыз етіп отыр. Бірнеше өңір зауыт өніміне жиі сұраныс жібереді», дейді «Kazakh Invest» ҰК» АҚ өңірлік филиалының басшысы Мұрат Балабаев.
«Гежуба Шиелі цемент компаниясы» ЖШС өнімін тұтынушылар қатарына 2019 жылдан бері Өзбекстан мемлекеті де қосылды. Өндіріс орны жылына осы елге шамамен 300 мың тонна өнім экспорттайды. Бұл еліміздегі цемент экспортының 20 пайызы екен.
Зауыттың Шиеліден бой көтеруінің бір себебі – аудандағы кен орындарында өндіріске қажетті құм, доломит, әк тасы мен уақталған қиыршық тас шығарылады. Цементке қажетті арнайы қоспалар ғана сырттан тасымалданып отыр. Қалдықтардың қоршаған ортаға әсерін азайту үшін бөлінетін көмірқышқыл газы арнайы сүзгіден өтіп, тазартылады.
Серіктестік алғашқы жылдары жергілікті азаматтарды Қытайда оқыту арқылы жұмысшылар даярлауға ден қойған. Қазір солар түрлі қондырғының тілін білетін маманға айналды. Осы күні 260 тұрақты жұмыс орнындағы 220 жұмысшы – ел азаматтары. Мердігер мекемелерді қосқанда зауыт бас-аяғы 400-дей адамды жұмыспен қамтып отыр. Орташа жалақы мөлшері 250 мың теңгеден асады.
Зауыт тек жергілікті халықты жұмыспен қамтып қоймай, ауыл тұрғындарына көмек беріп тұрады. Індет іргеге жетіп, балалар қашықтан оқи бастаған уақытта компания оқушыларға 150-ден астам планшет алып берді. Шиелі жұртына «Жедел жәрдем» көлігі мен инватакси сыйға тартты. Әр қыста әлеуметтік жағдайы төмен отбасыларға көмір, азық-түлік жеткізіп береді.
Былтыр 1 100 000 тонна цемент өндірген серіктестік биыл да қарқынды төмендетпек емес. Жұмыс істей бастағалы бері жергілікті және республикалық бюджеттерге 12 млрд теңгеге жуық салық түсірген кәсіпорын сапаға баса мән береді. Осыдан да бүгінде Шиелі цементі сұранысқа ие өнімге айналып отыр.
Қызылорда облысы,
Шиелі ауданы
