Білім саласында сынақ, неше түрлі сайыс, тест компьютер арқылы өтеді, мектептерге мұғалімдер конкурс арқылы кіреді. Дегенмен, мұғалімдер бұл кедергілерді де айналып өтетін жолды тауып алған дегенге сенесіз бе? Барлық мұғалімді кінәлай алмаймыз, әйтсе де ауырдың үстімен, жеңілдің астымен жүретін қулар бұл салада да азаймай тұр.
Жаңа оқу жылы қарсаңында Маңғыстау облысында 60 мұғалім жалған дипломмен жұмыс істегендігі анықталды. Олар бір емес, бірнеше жыл бойы оқушыларға сабақ беріп келген. Қазіргі таңда жалған құжат жасатып, айлық алып келген 60 мұғалімнің барлығы жұмыстан қуылды. Жалған құжатты «мұғалімдермен» енді тергеу орындары айналысып жатыр, оларға айлыққа төленген қаражат мемлекет бюджетіне қайтарылатын болады.
– Облыстағы мұғалімдердің дипломын анықтау үшін жоғары оқу орындары мен техникалық және кәсіптік білім беру ұйымдарына сұраныс жіберілді. Бұл ретте олардың жұмыс істеген уақытындағы қаржыны мемлекеттік бюджетке қайтару туралы сот органдарына шағым жолданды. Бұл бағыттағы жұмыстар жалғасып жатыр, – деп хабарлады Маңғыстау облысының білім басқармасы.
Мұғалім мен мектеп – білім мен тәрбиенің қайнары. Ақша табу үшін қылмыс жасай алған мұғалім оқушыға қандай білім, қандай тәрбие бере алады? Бұл мұғалімдерден оқып кеткен оқушылардың ала алмаған білімінің орны толар ма?
Бойында өз ісіне махаббат, ел, ұрпақ болашағына деген жауапкершілік болмаса, ақша үшін жүргендер мұғалім деген аттан садаға. Мұғалімдікке тек жалақы үшін немесе бөлінген грант үшін қызығатындарға ұрпақ тізгінін ұстату қиын.
Маңғыстау облысы
