Екі бөлімге құрылған концерт сахна төрінде сан алуан жанрдағы би өнерінің жауһарларын жарқырата көрсетті.
– Труппамыздың жазғы демалыстан кейін көрермендердің алдына алғаш шығуы болғандықтан біз бұл кешке аса ыждағаттылықпен дайындалдық. Әртістеріміз де көрерменін сағынып қалыпты. Өзіңіз куә болғандай, бағдарламамыздың «Nomad Dance Gala» деп аталатын бірінші бөлімінде отандық талантты да жас балетмейстерлердің туындылары мен ұлттық нөмірлер таныстырылды. Әлбетте, кеш премьерасыз өтпейді. Қазақ ұлттық хореография академиясы дайындаған «Асан мен Үсен» көңілді жаңа нөмірі балет жанкүйерлеріне тосын жаңалық болғаны сөзсіз. Ал кешіміздің екінші бөлімінде біз XX ғасыр жауһары – Н.Римский-Корсаковтың музыкасына кемеңгер хореограф М.Фокиннің «Шехеразада» балетін ұсындық. Спектакльге арналған сценографияны үздік театр суретшілерінің бірі Л.Бакст жасаған болатын. Ол – Санкт-Петербург пен Парижде көп жұмыс істеген, өткен ғасырдың басында экзотика мен ориентализм ерекшелігіндегі еуропалық сән үлгілерінің шығарушысы болған кәнігі шебер маман, – деді «Астана Опера» балет труппасының көркемдік жетекшісі, Ресейдің халық әртісі Алтынай Асылмұратова.
Театр гала кеште жетекші солистердің, сондай-ақ кордебалет әртістерінің қатысуымен болатын нөмірлерді көрермен назарына ұсынды. Олар жеке және дуэтте өнер көрсетті. Концерттік бағдарлама «Тұран» этно-фольклорлық ансамблінің музыкасына қойылған Анвара Садықова мен Алмат Шәмшиевтің хореографиясындағы «Жәрмеңке» нөмірімен ашылды. Сондай-ақ бұл кеште Әмина Кисембаева мен балет әртістері Анвара Садықованың тағы бір авторлық қойылымы – «Steppe Sons» альтернатив-фолк тобының музыкасына қойған «Сарматтық абыз әйел» нөмірін де нақышына келтіре орындады.
Ал Патрик де Бананың қойылымындағы «Дала үні» балетінен адажионы Қазақстанның еңбек сіңірген қайраткері Айгерім Бекетаева мен Ғалымжан Нұрмұхамет, Олжас Тарланов пен Әсел Шайкенованың тамаша тандемі таныстырды. Сонымен қатар мазмұнды бағдарламаға атақты балетмейстердің хореографиясындағы тағы бір жарқын нөмір – «Тұран» этно-фольклорлық ансамблінің музыкасына қойылған «Қилы заман» нөмірі енгізіліп, оны Сұлтанбек Ғұмар кәсіби жоғары деңгейде орындап шықты. Ғажайып әрі қызықты ұлттық нөмірді елордалық көрермендер аса зор ықылас һәм толассыз қошеметпен қарсы алды.
Екі күн қатарынан көрсетілген бұл гала кеште көрермен қауым әртістердің қос құрамының да шеберлігіне баға беруге тамаша мүмкіндік алды. Әсіресе көпшіліктің көңілінен шыққан жарқын балет – «Шехеразаданы» қос құрам ойынында салыстыра тамашалап, шынайы баға берудің сәті де осы жолы түсті. Атап айтсақ, айтулы спектакльде Алтын құлдың басты партиясын Серік Нақыспеков пен Қазақстанның еңбек сіңірген қайраткері Бақтияр Адамжан орындаса, Зобеиданы Қазақстанның еңбек сіңірген қайраткері Айгерім Бекетаева мен Анастасия Заклинская таныстырды. Сөзсіз, бұл гала кеш балет маусымының ең жарқын оқиғаларының бірі болғаны анық.
Маусымашар концерттің тағы бір еркшелігі өткен театр маусымында балетмейстерлік қырымен де көпшілік көрерменнің ықыласына бөлнген солист Сұлтанбек Ғұмар бұл кеште «Mangurt» және «Рух» деп аталатын қос туындысын ұсынды. Оларды Нима Токов, Камила Орманова, Ислам Қайыпбай, Айдан Қалжан және «Астана Опера» әртістері сәтті орындап шықты. Одан бөлек, айтулы балеттік жарқын бағдарламада Ғазиза Молдахметтің орындауында «Сыған биі», Қазақстанның еңбек сіңірген қайраткері Әнел Рүстемова мен Жақсылық Сауқымбековтің интерпретациясында «Аңсау» нөмірлері таныстырылды. Қорыта айтқанда, «Nomad Dance Gala» кеші еліміздегі хореография өнерінің бірегей стилін іздеуге деген талпынысты ғана көрсетіп қоймай, сонымен қатар отандық балетті жаңа һәм анағұрлым жоғары деңгейге көтергені сөзсіз.
