Оның тауға құмарлығы аяқастынан басталған. Алғашқыда ешбір дайындығы болмаса да, альпинистерге ілесіп биікке өрмелеу сапарына қатысыпты. Алайда алғашқы жорығы айтарлықтай нәтижелі бола қоймаған. Содан кейін шыңға өрмелеуші спортшылардың кеңесімен тыңғылықты дайындықтан өткен. Бұл оның студент кезі еді.
«Алматыда альпинистерге арналған арнайы жасанды тау жыныстарынан тұратын спорт қалашықтары бар. Ол жақта алып тауды бағындыруда қандай қауіпсіздік ережелерін сақтау керек екенін үйреніп, тауға шығу шеберліктерін шыңдауға болады. Міне, мен осы бір спорт алаңқайында үздіксіз дайындықтан өттім. Сондай-ақ оттегі маскасын тағып, таңғы жүгіріске көштім. Арқама он литрлік су бөтелкесі салынған сөмкені асынып немесе гір тастарын көтеріп жүруді әдетке айналдырдым. Алматы қаласында Абай даңғылымен жеті-сегіз шақырымды еңсеруді мақсат тұттым. Он кило салмақ арқама үйреншікті болғанда, жиырма кило салмақты көтере бастадым. Менің мұндай ауыр салмаққа көшкеніме альпинистер тобының жетекшісі арқау болды. Ол маған жүк тасушы болсаң, килосына 5 доллар төлейміз деп айтқан еді. Ақша табуға талпынған студентке бұдан артық қандай құлшыныс қажет», дейді Д.Казанцев.
Дмитрийдің ең алғашқы бағындырған асуы – Алатаудың «Астана шыңы». Теңіз деңгейінен есептегенде биіктігі – 4 376 метр. Оған кейіпкеріміз бес қаруын сайланып, жоғары дайындықпен барған.
«Бізді тікұшақ таудың белгілі бір деңгейіне дейін әкеп тастады. Ол жерге азық-түлік, құрал-жабдықтарымызды тастап, жоғары қарай біріміздің артымыздан біріміз еспе арқан арқылы көтерілдік. Менің арқамда 37 кило салмағы бар жүк сөмкесі болды. Ол күн мен үшін ауыр сынаққа айналды. Алайда табанды түрде жасаған жаттығуларым бұл жорықта өз жемісін берді», дейді.
Одан кейін Іле Алатауының ең биік нүктесі – Талғар шыңын да бағындырыпты. Бұл шыңның құзар биігі 5 мың метрден асады екен. Жыл он екі ай ақ қармен бүркенген Тянь-Шань тау жоталарының солтүстік сілемін бағындыру оңайға соқпаған. Өйткені алғашқы биік шыңдардай қар мен қара жері тарғылданып жатпайды. Айнала – түгел аппақ қар. Бұндай уақытта арқаңа асынған сөмкеңнің салмағы да ұлғая түседі. Үстіңе киген қалың киім де жүк үстіне жүк. Оның үстіне омбы қарда омақасып шалт бассаң, қар көшкіні туындап кетуі де ғажап емес.
«Қасат қардың машақатына тап болдым. Алайда бұл жағдай менің тауға шығуға деген құлшынысымды қайтармады. Қайтпас қайсар мінезіме тәнті болғандар менің тарапыма жылы лебіздерін жолдады. Жалпы, тау шыңына өрмелегендер тек қолдың ғана емес, аяқтың да күшін тиімді пайдаланғаны абзал. Тау шыңына өрмелеу әрбір мақсатшыл азаматқа аласармас биіктерді бағындыруға, басқа түскен сын-сынаққа сынып қалмай, тайсалмай, әрдайым жеңімпаз бола білуге үйретеді. Кей кезде шыңның құзар басына шыққанда тауға өрмелеушілер ішкі эмоциясын шығарады. Біреуі айғай салса, біреуі көз жасына ерік береді. Әсіресе көңілдің мұндай алабөтен шағына Отанымыздың ең биік нүктесі шығыс Тянь-Шань тауындағы Хан Тəңіріне шыққанда куәгер болдым», дейді кейіпкеріміз.
Альпинистер тобын Хан Тәңірінің белгілі бір жазық баурайына дейін тікұшақ алып келген. Әрі қарай екі аяққа сенім артып, биікке өрлеу басталыпты. Д.Казанцевтің айтуынша, оның өміріндегі осы ең маңызды сапары сәтті аяқталып, еліміздің басты биік шыңын бағындырған. Бұл – әлбетте, екінің бірінің қолынан келмейтін ерлік. Бәлкім, алғыр жігіттің әскери борышын өтеуге келуі де осы төзімділігі мен шыдамдылығынан шығар.
Кейіпкеріміз альпинизмнен үлкен жетістіктерді бағындыру үздіксіз еңбекті, белгілі бір дарынды қажет ететінін айтады. Қолданбалы және спорттық дағдыларды қалыптастырады. Адам моторикасының жан-жақты дамуына септігін тигізеді. Физикалық белсенділіктің ұзақтығы адамды төзімділікке, сабырлылыққа тәрбиелейді.
«Жалпы, тау спортынан кейін Ұлттық ұлан сапында мерзімді әскери қызметімді өткеруге келгенімде ешқандай қиындыққа кезікпедім. Әсіресе дене даярлығында үздіктер қатарынан көріндім. Бұл спорт түрінің бір тиімді тұсы – саған айналаңдағы керемет пейзаж көтеріңкі көңіл күй сыйлайды. Әлемде табиғаттан көркем және онымен қарым-қатынаста болудан әдемі ештеңе жоқ. Биік таулы ландшафтың алуан түрлі қырат-бұйраты көз алдымнан кетпейді», дейді ол.
Ұлттық ұлан сапында Отан алдындағы борышын өтеуді өзіне абырой санайтын Дмитрий өзінің болашағына сеніммен қарайды. Алдағы уақытта Хан Тәңірі шыңын екінші рет бағындырғысы келетінін айтты. Бірінші рет альпинистер салған сүрлеу арқылы шықса, енді тікелей жартас арқылы шығуды мақсат тұтады. Бұл – нағыз көзсіз ерлердің ғана қолынан келетін шаруа. Оның қауіпті екенін де мойындайды.
«Егер мен құз-жартасты ауыздықтау арқылы шың басына көтерілсем, «Алтын мұзжарғыш» жүлдесіне ие боламын», дейді кейіпкеріміз.
Біз тауға ынтық тарланға мерзімді әскери қызметін сәтті өткеріп, алға қойған арманына жете беруіне тілектестік білдірдік.
