Төрт күн бойы театр сахнасында ұлттық және әлемдік үздік шығармалар сахналанып, дәуірлер шежіресін жеткізді. Фестивальға Грузия, Иран, Татарстан, Қырғыз мемлекеттерімен қатар Қазақстаннан барлығы 8 театрдан 200-ге жуық сахна шебері өнер көрсетіп, Маңғыстау жұртшылығының ықыласына бөленді.
«Abish alemi» III халықаралық театр фестивалінің сараптамалық кеңес мүшелері қатарында Қазақстанның халық әртісі Асанәлі Әшімов, М.Әуезов атындағы Қазақ ұлттық академиялық драма театрының директоры, театр сыншысы Еркін Жуасбек, театртанушы, өнертану кандидаты, Қазақ ұлттық өнер академиясының театртану факультетінің профессоры Бақыт Кәкиқызы, театртанушы, театр сыншысы, өнертану кандидаты Айсұлу Сағитова, Түркиядан келген режиссер Биркан Гүргөн төрелік етті. Сонымен қатар ТҮРКСОЙ бас хатшысы Сұлтан Раев, Асанәлі Әшімов атындағы «Өнер мен мәдениетті қолдау» қорының төрайымы Бағдат Әшімова, «Құрмет» орденінің иегері, жазушы Жабал Ерғалиев, Әбіш Кекілбаевтың отбасы мүшелері, Қазақстанның еңбек сіңірген қайраткері Нұрнияз Мұханов фестиваль кеңесшісі ретінде қатысты.
– Спектакльдерді тамашалай отырып, есімі ХХ ғасырдағы ең үздік жүз жазушының қатарына енген қарымды қаламгердің шоқтықты шығармаларын инсценировкалап, өзге тілдерге аударып, театрлар репертуарына енгізуде, киноэкранға шығаруда алда үлкен міндеттер тұрғанын ұқтық. Осы орайда қаламгердің «Шыңырау», «Күй», «Бір шөкім бұлт», тағы да басқа прозалық туындыларын сахнаға лайықтап, көрермен ықыласына бөленіп жүрген Жантөрин атындағы театр ұжымының еңбегін атап көрсеткім келеді. Егер біз облыстық музейді Әбекең шаңырағының шырақшысы десек, Н.Жантөрин театрын Әбекең шығармаларының жоқшысы мен жаршысы деуге толық негіз бар. Даңқты сөз шебері, кемеңгер мемлекет қайраткерінің 85 жылдығын атап өту жазушының туған күні қарсаңында елордадағы мерекелік іс-шаралармен қорытындыланады.
Жантөриндіктер Әбекеңнің өздері сахналаған төрт шығармасымен осы іс-шараға қатысуға шақырту алып отырғаны – бәріміз үшін мәртебе. Жазушының рухани мұрасы халқымен бірге жасай береді, – деді Маңғыстау облыстық мәдениет, тілдерді дамыту және архив ісі басқармасының басшысы Нұртас Сали.
Сарапшылар шешімімен іріктеу кезеңінен өткен Иран, Татарстан, Қырғызстан, Грузия елінің театрлары және Қазақстанның Астана, Алматы, Көкшетау және Орал қалаларынан қатысушы театрлар «Үздік театр» аталымымен марапатталды. Сондай-ақ «Abish alemi» театр фестивалінің «Үздік эпизодтық бейнесі» арнайы жүлдесімен «Не плачь, когда я умру» спектакліндегі Микаил рөлі үшін Грузия Республикасының Гейдар Алиев атындағы Тбилиси азербайжан кәсіби Мемлекеттік драма театрының әртісі Торғай Вализаде, «Үздік екінші пландағы ер адам бейнесі» арнайы жүлдесімен «Электра» спектакліндегі Агаменнон рөлі үшін Жалал Шахбазнезад (Иран театры), «Үздік екінші пландағы әйел адам бейнесі» арнайы жүлдесімен Шыңғыс Айтматовтың «Ғасырдан да ұзақ күн» романы бойынша «Ман» спектакліндегі Найман ана рөлі үшін Анарбаева Жылдыз (Қырғыз Республикасы), «Үздік ер адам бейнесі» жүлдесімен «Любишь, не любишь» спектакліндегі Шал рөлі үшін Татарстан Республикасының халық әртісі Х.Хамматуллин, «Үздік әйел адам бейнесі» жүлдесімен «Қаралы сұлу» спектакліндегі Қарагөз рөлі үшін Батыс Қазақстан облысынан келген әртіс Х.Шамелова, «Үздік режиссура» жүлдесімен «Станционный смотритель» спектаклі үшін көкшетаулық Т.Кулов, «Үздік актерлік ансамбль» жүлдесімен Алматы қаласынан келген «Йерма» спектаклі, «Үздік спектакль» жүлдесімен «Станционный смотритель» көкшетаулық спектаклі марапатталды. Сондай-ақ ТҮРКСОЙ халықаралық ұйымының Бас хатшысы Сұлтан Раев ІІІ халықаралық «Abish alemi» театр фестиваліне қолдау білдіріп, бірнеше мәрте ұйымдастыруға мүмкіндік бергені үшін Маңғыстау облысының әкімдігін және театр саласының бірнеше маманын ТҮРКСОЙ халықаралық ұйымының Алғысхатымен және төсбелгісімен марапаттады.
«Жақсының шарапаты елге тиеді» дегендей, арамызда болмағанымен, шығармалары арқылы халқының жүрегіне жол тапқан жазушы ғұмыры мәңгі.
Маңғыстау облысы
