Павлодарда өңірлік этномәдени бірлестіктердің өзара іс-қимылдарын ұйымдастыру мәселелері бойынша облыстардағы «Қоғамдық келісім» мекемелері басшыларына арналған республикалық семинар өтті. Іс-шарада 16 жыл тарихы бар жергілікті Достық үйінің ұлтаралық келісім мен тұрақтылықты нығайту, әр халықтың ана тілін, салт-дәстүрді, этнос мәдениетін жаңғырту мақсатында атқарып жатқан жұмыстары тәжірибе ретінде көрсетілді. Өңірлік Қазақстан халқы Ассамблеясы құрылымдары, этномәдени бірлестіктер мен шығармашылық ұжымдар этносаралық келісім идеяларын жүзеге асыруда айтарлықтай іс тындырып отырғаны байқалды. Ұйым мекеме қызметін қайта форматтаудың жаңа тәсілдеріне байланысты барлық ауқымды іс-шараны кешенді түрде өткізуді әдетке айналдырған. «Өскелең ұрпаққа өнегелі тәрбие», Еvent-tram «Достық трамвайы», «Әнімді саған арнаймын, Қазақстан», «Қазақша ән салайық», «Ұлттық киім – ұлттың көркі», тағы басқа жобалар өзінің тиімділігін байқатыпты.
– Былтыр Достық үйінің 15 жылдығына орай «Достық үйі – бейбітшілік пен келісім мекені» атты кешенді жоба аясында 60-тан аса іс-шара ұйымдастырылып, 3,5 мыңнан аса адам қамтылды. Бізде этномәдени бірлестіктер мен құрылымдардың бірлескен жұмыс тәжірибесін көрсететін «Комьюнити-орталық» бар. Мемлекет басшысы Қасым-Жомарт Тоқаев қазақ тіліне қатысты «Egemen Qazaqstan» газетіне берген сұхбатында «Қазақтың тілі – қазақтың жаны! Халқымыздың тарихы да, тағдыры да – тілінде... Біз мемлекеттік тілдің мәртебесін көтеру бағытындағы жұмыстарды үздіксіз жалғастыра береміз», деп айтқаны мәлім. Бұл тарапта Ассамблеядағы «Қазақша ән саламыз» атты жобамыз өзге ұлт өкілдеріне мемлекеттік тілді үйретуде маңызды болып отыр. Негізгі мақсаты – жастар арасында қазақ мәдениетіне деген құрмет сезімін тәрбиелеу, өзге этнос өкілдері арасында рухани бірлік пен ұлтаралық келісім идеяларын тарату, мемлекеттік тілдің дамуына ықпал ету. Бұл арқылы қазақтың мәдени құндылықтары ұлықталады. Этномәдени бірлестіктердің өкілдері қазақша ән шырқап, рухани өнерімізбен танысады, – дейді жергілікті «Қоғамдық келісім» КММ басшысы Нүрия Көбенова.
Мәдениет және ақпарат министрлігі Этносаралық қатынастарды дамыту комитеті Қазақстан халқы Ассамблеясымен өзара іс-қимыл басқармасының басшысы Динара Жұманова «Қоғамдық келісім» мекемесі және Достық үйлерінің жұмыстарын жетілдіру мәселесі әрқашан өзекті екенін атап өтті. Бұл үдеріс мемлекеттік этносаясаттың басымдықтары мен қоғамдық сұраныстарға сәйкес келуі әрі үздіксіз болуы керек.
«Ассамблеяның 33-сессиясындағы шешімдерді өміршең ету үшін біздің министрлік, ҚХА және депутаттар мен жергілікті атқарушы органдардың өзара іс-қимылдарын біріктіретін 34 Жол картасы, ҚХА-ның 13 арнайы жобасы жүзеге асып жатыр. Алдағы жылы Ассамблеяның құрылғанына 30 жыл толғалы отыр. Соған орай «Бірлік пен келісімнің 30 жылы» деген атаумен іс-шаралар жоспары түзілді. Іс-шаралардың дені ағартушылық, халықтар арасындағы достықты нығайту бағыттарында өткізіледі. Бұл тарапта өзге ұлт өкілдері арасындағы мемлекеттік тілдің дамуына зор көңіл бөлінеді. «Мәміле», «Үйде сөйле», «Мемлекеттік тілге 7 қадам» клубтарының арнасын кеңейту жоспарланған. Ал қолданыстағы қазақ тілін үйрету курстарының сапасын көтеру маңызды», дейді министрлік өкілі.
Семинарда еліміздің әр түпкірінен жиналғандар өзара пікір алмасып, түрлі шеберлік сағаттарына қатысты.
Павлодар облысы
