Павлодарда мүсінші, халықаралық Turan сыйлығының лауреаты Данияр Сарбасовтың жеке көрмесі ашылып отыр. Экспозицияға автордың соңғы он жылда сомдаған отызға тарта кестелі туындылары іріктеліп қойылған. Анималист-мүсінші еңбектерінің басым көпшілігі ұлтымыздың төл жануары, қанатты пырақ жылқы малына арналған. Мүсінші туындылары сонымен қатар қиял-ғажайып ертегілер мен қадау-қадау тарихи оқиғаларға негізделіп жасалған. Мәселен, дәуіт пен жыланның бейнесі сомдалған ерекше мүсін қойнына кенен тарихи астар жасырған.
– Дәуіт пен жыланның бейнесі сомдалған мүсінге тереңірек үңілсек, ондағы жыланнан қытайдың империясын, қытайдың айдаһарын көруге болады. Ал дәуітті ғұнның кезіндегі кентаврлар деп қарастырсақ болады. Сондықтан мұнда ежелгі тарихтағы ғұндардың қытай империясын жаулап алғаны айтылып тұр. Сонымен бірге «Пегас» деген жұмысым арқылы халықаралық «Шабыт» фестивалінің бас жүлдесін иелендім. Онда сақтың өрнектері мен қазіргі қазақы нақыштарды араластырып, өз ойымдағы стилистиканы бейнелеп, дүниеге әкелген едім, – дейді мүсінші Данияр Сарбасов.
Жоғарыда айтқанымыздай, көрмеге қойылған экспозициялардың басым көпшілігі жылқы тақырыбын қаузайды. Мұнда бәйге аттары, жорға, шу асау бейнесіндегі жануарлар, Ақан серінің Құлагері, мифтік бейнедегі мүйізді тұлпарларға дейін әспеттелген. Сондай-ақ мүсінші скиф-сақ мәдениетін терең зерттеп, осы бағытта бірнеше туындыны өмірге әкелген. Баянауыл ауданының тумасы «Атамекен» атты алғашқы көрмесін туып-өскен топырағындағы жерлестеріне арнап отыр.
