Сурет: primeminister.kz
Халықаралық көрменің салтанатты ашылу рәсіміне Қытай Халық Республикасы Мемлекеттік кеңсесі Премьері Ли Цян, Малайзия Премьер-министрі Анвар Ибрагим, Өзбекстан Премьер-министрі Абдулла Арипов, Моңғолия Премьер-министрі Лувсаннамсрайн Оюун-Эрдэнэ, Сербия Премьер-министрі Милош Вучевич қатысты.
Өткен жылдың қорытындысы бойынша Қытайдың Орталық Азия елдерімен тауар айналымының жартысынан астамы Қазақстанға тиесілі болып отыр. Премьер-министр Олжас Бектенов мемлекеттер арасындағы кедергісіз сауда-саттық, электронды коммерция, көлік пен логистиканы дамыту, озық ЖИ технологияларын енгізуде өзара іс-қимылды нығайтудың маңыздылығын атап өтті.
«Жібек жолы электронды коммерциясы» қанатқақты аймағын құрудағы ынтымақтастықты нығайту келешегі зор болып саналады. Қазақстандық павильондар «Alibaba» және «JD.com» ірі сауда платформаларында табысты жұмыс істеп тұр. «Douyin» алаңында павильон ашу, елімізде цифрлық сауда арналары арқылы логистиканы жеңілдету үшін бонд қоймалары мен кешенді қойма инфрақұрылымын салу бойынша жұмыс жүргізіліп жатыр. Қазақстан Қытайдан Еуропаға жерүсті тасымалының 80%-дан астамын қамтиды. «Батыс Еуропа – Батыс Қытай» халықаралық транзиттік автодәлізі, Ляньюньган портындағы логистикалық орталық, Сиань құрғақ портындағы жүк терминалы, Қытаймен шекарадағы үшінші теміржол өткізу пункті және басқа да ірі инфрақұрылымдық жобалар трансқұрлықтық экономикалық дәліздер жүйесін жетілдіруге, тауар айналымын ұлғайтуға және екі ел халқының әл-ауқатын арттыруға бағытталған. Қазақстан цифрландыру саласында электрондық үкіметтің даму индексі бойынша 24-орын, онлайн қызметтер бойынша 10-орын, сондай-ақ Дүниежүзілік банк рейтингіне сәйкес мемлекеттік технологиялардың жетілу индексінде 6-орын алады. Жасанды интеллектіні қолдану мәселелері бойынша тәжірибе алмасу экономикалық прогрестің қозғаушы күші бола алады», деді Олжас Бектенов.
ҚХР Мемлекеттік кеңесінің Премьері Ли Цян және халықаралық көрмеге қатысушы елдер делегацияларының басшылары цифрландыру тақырыбына бағытталған Қазақстанның «Жаңа дәуір, ортақ болашақ» ұлттық павильонында ұсынылған өнімдермен танысты. Сауда және интеграция министрі Арман Шакқалиев, «Ұлттық ақпараттық технологиялар» АҚ, «Kazakh Invest», АХҚО, «QazTrade», «Kaspi Bank» өкілдері еліміздегі табысты жобаларды, оның ішінде электрондық және қаржылық қызметтерді, трансшекаралық сауданы дамыту, инвестициялар тарту бойынша жетістіктерін таныстырды. Сонымен қатар отандық әзірлеушілердің стартаптары көрсетілді.
Қазақстанның коммерциялық павильонында биылғы жаңалық отандық өнімді онлайн сату болды. 260 шаршы метр алаңда отандық өндірушілердің 50-ге жуық тауарының – ет, сүт, май, астық өнімдері, кондитерлік өнімдер, шырындар мен сусындар, бал, тоқыма және басқа да өнімдер көрмесі ұйымдастырылды. «TikTok» платформасы арқылы стриминг іске қосылды, бұл стендке келушілерге ғана емес, сонымен қатар бүкіл әлемдегі көрермендерге өнімдердің ассортиментімен танысуға, оларды нақты уақыт режімінде сатып алуға мүмкіндік береді. Көрменің алғашқы сағаттарында ғана онлайн режімде 22 мың долларға жуық сомаға отандық тауар сатылды. Сондай-ақ павильон биыл 2 есе кеңейтілді. Қатысушылардың 80%-дан астамы – ШОБ өкілдері. Жыл сайын халықаралық көрмеге 300 мыңнан астам қытайлық кәсіби сатып алушы қатысады, бұл ҚХР-ға экспортты ұлғайтуға жағдай жасайды.
