«Біз 2025 жылға дейін 800 мың баланың заманауи мектепте оқуына жағдай жасаймыз. Осылайша, апатты жағдайдағы және үш ауысыммен оқитын оқушылар үшін мектеп мәселесін толығымен шешеміз. Бұл ауыл және қала мектептерінің айырмашылығын едәуір азайтады. Жалпы, мектеп салу Үкімет пен әкімдіктер үшін басты міндеттің бірі болуы керек», деген Президент сөзі жадымызда.
Мемлекет басшысының тапсырмасына сәйкес еліміздің барлық қиырында «Жайлы мектеп» ұлттық жобасы аясында заманауи білім ошақтары бой көтеріп жатыр. Бұл жұмыс Жамбыл облысында да талапқа сай қолға алынған. Мәселен, жаңа оқу жылында бір білім ошағы пайдалануға берілді. Жалпы алғанда, қыркүйек айында өңірде алты мектеп пайдалануға берілді.
Бірнеше күн бұрын облыс орталығы Тараз қаласында №66 мектеп оқушыларға есігін айқара ашты. Білім беру нысаны «Жайлы мектеп» ұлттық жобасы аясында бой көтерген болатын. Жергілікті атқарушы билік өкілдері келтірген дерекке жүгінсек, су жаңа білім ордасы 1 200 орынға шақталған. Заманауи құрал-жабдықтардың барлығымен қамтамасыз етілген. Жаңа мектептің ашылу салтанатына қатысқан өңір басшысы Ербол Қарашөкеев Президент тапсырмасы негізінде қолға алынған жұмыс үздіксіз жалғасатынын тілге тиек етті.
«Мемлекет басшысы Қасым-Жомарт Тоқаевтың тапсырмасына сәйкес «Жайлы мектеп» ұлттық жобасы аясында білім ордасы есігін айқара ашты. Жаңа оқу жылында дәл осындай мектеп Байзақ ауданының Сарыкемер ауылында пайдалануға берілген болатын. Бұл – жоба аясында бой көтерген кезекті білім беру мекемесі. Жалпы, ұлттық жоба шеңберінде қолға алынған жұмыс алдағы уақытта да талапқа сай жалғасады.
Ұлттық жоба оқушы орындарының тапшылығы, апаттық жағдайдағы мектептерді жою және үш ауысымды оқыту мәселесін шешуге бағытталғаны баршаға мәлім. Біздің басты мақсатымыз – балалардың сапалы білім, саналы тәрбие алуы үшін заманауи, қауіпсіз әрі ыңғайлы орта қалыптастыру. Сол бағытта жұмыс атқара береміз», деді өңір басшысы мектептің ашылу салтанатында сөйлеген сөзінде.
Жаңа білім ошағы Тараз қаласындағы «Бәйтерек» шағын ауданында орналасқан. Білім ұясында жайлылық пен қауіпсіздіктің барлық талабы сақталған. Мұнда қажетті бейнебақылау камералары мен дабыл түймелері орнатылған.
Ғимаратта 59 оқу кабинеті бар екен. Сонымен қатар интерактивті тақта, зертханалық кабинеттер, жайлы кітапхана, арнайы шеберханалар мен коворкинг орталық қарастырылған. Сондай-ақ екі бірдей спорт залмен қамтылған. Бұдан бөлек, қосымша білім беру қажеттілігі бар балаларға арналған арнайы кабинеттер де жеткілікті.
«Біздің шағын ауданның тұрғындары үшін бүгінгі күн – қуанышты күн. Біз бұл білім беру нысанын асыға күттік. Балаларымыздың бағына орай өзіміз қоныстанған үйдің маңынан су жаңа заманауи білім ордасы ашылғаны көңіл қуантады. Жаңа мектептің салынуына күш салған азаматтардың барлығына айтар алғысымыз шексіз. Ұлттық жоба аясында заманауи білім ұясының бой көтеруіне ықпал еткен Мемлекет басшысына да зор алғысымызды білдіреміз. Енді біздің балаларымыз Президент артқан сенімнің үдесінен шығып, білімді азаматтардың қатарын толықтырады деп сенеміз. Мұндай қуаныш Тараз қаласынан бөлек барлық ауданға да жұғысты болсын», дейді көпбалалы ана Ғалия Құланбаева.
Жалпы алғанда, кейінгі уақытта Тараз қаласында жаңа білім ордасын салу жұмыстары қарқынды жүргізіліп жатыр. Мәселен, жаңа оқу жылында «Арай» және «Казарма» тұрғын алабының тұрғындары ұзақ жыл бойы айтып келген мектеп мәселесі оңынан шешіліп, жаңа оқу ордасы пайдалануға берілген болатын. Жергілікті атқарушы билік өкілдерінің айтуынша, облыс орталығындағы балалардың сапалы білім алуы үшін алдағы уақытта да қыруар жұмыс атқарылмақ.
Тараз
