Сурет: facebook.com/oquagartuministrligi/
Министрліктің таратқан ақпаратына сүйенсек, Аталған іссапар Қазақстан Премьер-министрінің техникалық және кәсіби білім жүйесіндегі студенттерге қолдау көрсету әрі саланы дамыту үшін елімізде Ұлттық құзыреттілік орталығын құру туралы тапсырмасын жүзеге асыру аясында ұйымдастырылды. Ғ.Бейсембаевтың мамандарды даярлайтын бірегей оқу орталығы – Лу Бань шеберханасына баруы жұмыс сапары барысындағы маңызды іс-шаралардың бірі болды. Кешен студенттердің жаңа өндірістік және цифрлық технолгогияларды, инженерлік жобалауды меңгеруіне мүмкіндік беретін заманауи құрал-жабдықтармен, оқу материалдарымен жарақтандырылған. Бұл тәжірибені елімізде ұлттық құзыреттілік орталығын ашу кезінде қолдану жоспарланып отыр, бұл техникалық және кәсіптік жүйе студенттері үшін жаңа мүмкіндіктерге жол ашады.
Тяньцзиньде Ғ.Бейсембаев Қытайдың жетекші колледждерінің өкілдерімен бірнеше келіссөз өткізді. Тараптар екіжақты ынтымақтастықты дамыту және жұмысшы мамандарды даярлауда тәжірибе алмасу мәселелерін талқылады. Сондай-ақ 48 мемлекеттің салалық министрлерінің қатысуымен өткен Дүниежүзілік кәсіптік және техникалық білім беруді дамыту жөніндегі конференцияға қатысты. Отырыстың пленарлық сессиясында сөз сөйлеген министр Қазақстанда кәсіби-техникалық білім беру жүйесін дамытудың маңыздылығына тоқталып өтті.
«Қазақстан Президенті жариялаған «Жұмысшы мамандықтар жылы» аясында техникалық және кәсіби білім жүйесін трансформациялау жүргізіліп жатыр. Әсіресе күрделі өндірістік мәселелерді шешу үшін қажет эмоционалдық интеллект, инженерлік ойлау сияқты жұмсақ дағдыларды дамытуға ерекше назар аударылып келеді. Халықаралық тәжірибені ескере отырып, заңнамалық нормаларды жетілдіруге, колледждерді басқару жүйесін күшейтуге басымдық беріледі. Қазақстан өз студенттерінің бәсекеге қабілеттілігін арттыру үшін маман даярлау үрдісіне әлемдік кәсіби қауымдастық пен алдыңғы қатарлы білім технологияларын енгізуге ұмтылып отыр», деп мәлімдеді Ғ.Бейсембаев.
Сондай-ақ министр Қытай Халық Республикасының білім министрі Хуай Цзиньпэнмен екіжақты кездесу өткізді. Тараптар білім саласында Қазақстан-Қытай ынтымақтастығын арттыру, техникалық және кәсіптік білімде екі елдің тәжірибе алмасуы мәселесін талқылады.
