«Музейімізде тұрған қола қазанның биіктігі 58 сантиметр болса, диаметрі 60 сантиметрді құрайды. Қазанның төрт тұтқасы бар. Екі тұтқа жәдігерді көтеріп қоюға арналған болса, қалған екеуі қазанды аспалы шынжыр арқылы жоғары көтеріп, астына от жағу үшін пайдаланылады. Дерекке жүгінсек, ықылым заманнан жеткен жәдігер қоладан жасалған екен», дейді аудандық музейдің басшысы Элдар Өтембаев.
Музей директоры келтірген дерекке жүгінсек, пішіні жарты шарға ұқсайтын жәдігердің көлемі шамамен 60 литр суға шақталған. Қалыңдығы 0,8 сантиметрді құрайды. Ал төрт доғалы тұтқасы қазанды ұстауға ыңғайластырылып жасалған.
«Қазанның астыңғы жағында біріккен тұғыры бар. Күлгін түсті жәдігердің жоғары жағындағы ернеуінің аздаған бөлігі сынған. Ықылым заманда ғұмыр кешкен адамдардың темірді қай деңгейде, қандай мақсатта пайдаланғанын осы қазанға қарап-ақ аңғаруға болады. Жалпы алғанда қола қазан құнды археологиялық артефактілер санатына жатады. Біз үшін сонысымен де құнды», дейді музей директоры.
Жалпы, аудан орталығындағы музейде өңірдің тарихынан сыр шертетін көне жәдігерлер аз емес. Әйтсе де музей қызметкерлерінің айтуынша, ғимаратқа бас сұққан жергілікті тұрғындар көбінесе қола қазанның тарихын сұрайды екен.
Жамбыл облысы,
Тұрар Рысқұлов ауданы,
Құлан ауылы
