Саяси кемелдік көрінісі

2024 жыл еліміз үшін оңай болған жоқ. Табиғи апаттар мен сыртқы факторлардың салқыны тиді, сондай-ақ әлемде бұрын-соңды болмаған күрделі геосаяси ахуал қалыптасты. Дегенмен еліміз бейбітшілік үшін тиімді диалог орната алатын мемлекет ретінде өзінің халықаралық позициясын нығайтты. Бұл елдің қауіпсіздігін қамтамасыз етіп қана қоймай, экономиканың тұ­рақты дамуына септігін тигіз­ді. Әлеуметтік мемлекет ретін­дегі міндеттерін жүйелі жүзеге асыруды табанды тұрғыда жалғас­тырды. Айталық, былтырдан бастап «Ұлттық қор – балаларға» бағдарламасы аясында төлем бері­ле бастады. Зейнетақы, жәр­де­мақы, шәкіртақы, азаматтық сала қызметкерлерінің жалақы мөлшері өсті. Жүздеген жаңа мектеп, балабақша және дене шы­нықтыру-сауықтыру орталық­тары салынды. Шетелдің оннан аса беделді жоғары оқу орнының бөлімшесі ашылды. Ғылымды қаржыландыру көлемі арта түсті, мәдениет сала­сының қызметкерлеріне елеу­лі қол­дау көрсетіліп жатыр. Бұқара­лық спортты дамытуға да баса мән берілді. Мұның бәрін аза­мат­тардың жасампаздық әлеуетін арттыру үшін пайдалы инвестиция деуге болады.

«Келешек» атты бірыңғай ерікті жинақтаушы жүйенің заң­намалық негізін қалыптастыру мақсатында көп жұмыс атқарыл­ды. Онда жинақталған қаржыны еліміздің, шетелдің колледждері мен жоғары оқу орындарында білім алу, сондай-ақ тұрғын үй алуға жұмсауға болады.

Экология саласында да маңыз­ды өзгерістер жүзеге асы­ры­лып жатыр. Су ресурста­рын бас­қару, табиғатты қор­ғау, су маман­да­рының тапшы­лығын шешу ба­ғытында Қа­зақ ұлттық су ша­руа­шы­лығы және ирригация уни­верси­теті құрылып, су шаруа­шы­лы­ғын дамытуға арналған бағ­дар­ламалар қолға алынды. Бұл қадам елдің экологиялық тұрақ­тылығын қамтамасыз етуге, ирригациялық каналдарды жаңғыртуға бағытталған.

2025 жыл «Жұмысшы маман­дықтар жылы» деп жарияланды. Бұл – жұмысшы мамандықтарын дәріптеп, насихаттап, жастарды осы салаға тартуды көздейтін маңызды бастама.

Президент ауылдық аймақ­тарды дамытуға арналған ұлттық жобалардың жалғасаты­нын айтты. Жобалар ауыл тұрғында­рының өмір сүру сапасын артты­руға, медициналық инфра­құ­рылымды нығайтуға, жаңа жұ­мыс орындарын ашуға, ха­лық­тың әлеуметтік жағдайын жақ­сартуға бағытталған. Елге орал­ған жас мамандарға жағдай жасау, оларды жоғары табысты салаларға тарту Үкіметтің басым міндеттерінің біріне айналады.

Мемлекет басшысы халықтың үні – реформалардың негізі екенін әрі халықтың өмір сапасын жақсартуға арналатынын баса айтты. Сол тұрғыда Прези­дент бастамаларын қолдап, стра­те­гиялық міндеттерді жүзеге асыруға ат салысу саяси кемелді­ліктің көрінісі болмақ. Барша­мызға қоғам өмірін, адам қызме­тін дұрыс жолға қойып, жаппай өсіп-өркендеу жолында жұмыла еңбектене беру қажет.

Жұлдыз СҮЛЕЙМЕНОВА,

Мәжіліс депутаты