2024 жылы Жетісу облысында халықтың әлеуметтік осал топтарына 866 пәтер сатып алынды. Оған бюджеттен 15,9 млрд теңге қаржы бөлінді. Соның нәтижесінде 57 отбасы үйлі болды. Талдықорғанда 37 жаңа пәтердің, Сарқан қаласында 20 жеке тұрғын үйдің кілттері тапсырылды. Қала әкімі Ернат Бәзілдің айтуынша, жаңа аудандарда салынып жатқан бұдан да басқа көпқабатты тұрғын үйлер көп ұзамай өз иесін табады.
Облыс орталығында құрылыс жұмыстары қарқынды жүріп жатыр. Өңір басшысы Бейбіт Исабаев апатты тұрғын үй мәселелерін шешуге ерекше назар аударып отыр. Былтыр облыста 348 пәтер апатты деп танылып, 1,3 млрд теңгеге 137 пәтер сатып алынған. Жергілікті бюджеттен бөлінген 2,4 млрд теңгеге, атап айтқанда, Кербұлақ ауданында, Текелі, Талдықорған қалаларында 155 жаңа пәтер сатып алынды. Сондай-ақ «Самұрық-Қазына ҰӘҚ» АҚ демеушілерінің есебінен 560 пәтерлік 9 үй салынып жатыр.
Сарқан ауданы әкімдігінің хабарлауынша, аудан орталығында баспана салу мәселесіне кейінгі жылдары баса назар аударылып, ауқымды жұмыстар атқарылды. «2022 жылы тұрғын үй кезегінде тұрған азаматтар үшін 5 қабатты 50 пәтерлі үй, 2023 жылы «Болашақ» шағын ауданында екі қабатты 20 пәтерлі тұрғын үй қолданысқа берілді. Бұған қоса, ауданның әлеуметтік осал топтағы азаматтары үшін 24 тұрғын үй сатып алынды. 2024 жылы 20 үйдің кілті тапсырылса, жаңа жыл қарсаңында осы үлгідегі 30 тұрғын үйдің құрылысы аяқталып, қолданысқа берілді», деді Сарқан ауданының тұрғын үй-коммуналдық шаруашылығы, автомобиль жолдары, жолаушылар көлігі және тұрғын үй инспекциясы бөлімінің басшысы Әсет Қанапиянов.
Жаңа үйге ие болғандар қатарында жетім балалар, мүгедектігі бар баланы тәрбиелеуші отбасылар, мүгедектігі бар азаматтар, көпбалалы аналар, толық емес отбасылар, Екінші дүниежүзілік соғыстың ардагерлеріне теңестірілгендер бар.
Өңір әкімі баспасөз қызметінің мәліметінше, 2024 жылы өңірде 2 708 пәтер иесін тапты. Оның 1113 пәтерлік 129 үйі бюджет есебінен, 469 пәтерлік 9 үй коммерциялық тұрғын үй, 866 пәтер тұрғын үй сатып алу арқылы, 260 пәтерлік 4 үй демеушілер есебінен берілген.
Жетісу облысы
