2014 жылға дейін Алтайдың шыңдарында барыстың бары болжам ғана еді. Қойшылар мен аңшылардың «барыс көрдік» деген сөзіне біреу сенсе, енді біріміз күмәнмен қарағанбыз. Сол жылдың қаңтарында ғой, қар барысы Аршаты жақта құрылған фототұзаққа түсіп, сенсациялық жаңалық болған. Одан кейін сан мәрте дәлелденді. Ал Топқайыңның тұсында тұңғыш рет фотоға түсірілді.
3300 метр биіктікке ұмсынып тұрған Бүркіт сілеміне фототұзақ құру да оңай шаруа емес. Ақ қар, көк мұзда түу биікке шығып, барыс бағып жүрген инспекторлардың еңбегі ерен. Олардың да есімін ел білуі керек шығар, сапарды бастап барған Катонқарағай ұлттық паркі қарамағындағы жануарларды қорғау және өндіру бөлімінің бастығы Ерік Қасымов еді.
– Қыстыгүні тау бөктеріне атпен, одан әрі жаяу-жалпы жетіп, құрған фототұзақты тексердік. Бұл жұмыс бір өзімнің қолымнан келмейді. Сондықтан бірге барған әріптестеріме де мың алғыс. Барсақ, аппаратымыз шашылып жатыр. Сөйтіп, әлгі құрылғыны етекке алып түстік. Шынымды айтсам, сынған құрылғы жарамсыз болып қалды деп ойлағанмын. Сөйте тұра жады картасын тексеріп көріп едім, барыстың бірнеше суреті жарқ етті. Ең соңғы кадрға қоңыр аю түсіпті, – дейді Ерік Қасымов.
Демек темір сандықты сындырған да аю болып шықты. Бұл сурет – Алтайдың әлі ашылмаған құпияларының бірі ғана. Тау қойнауында қаншама тылсым жатқаны белгісіз. Бірақ тұмса табиғатты сақтап, келер ұрпаққа жеткізу – Ерік сынды табиғат жанашырларының парызы.
Катонқарағай орманының әр бұтағы, әр тасына дейін бір-бір аңыздың шежіресі іспеттес. Барыстың бұл суреті де сол шежіренің жаңа парағы болмақ.
Шығыс Қазақстан облысы,
Катонқарағай ауданы
