Тәжікстан көрмеге қатысатынын қуаттады

Жақында Сыртқы істер министрінің бірінші орынбасары – ЭКСПО -2017-нің комиссары Рәпіл Жошыбаев бастаған Қазақстан делегациясы Тәжікстан Республикасында жұмыс сапарымен болды. Тәжікстан Республикасы Пре­мьер-министрінің бірінші орынбасары Д.Саидпен, Эко­номи­калық даму және сауда ми­нис­трі Н.Хекматуллозодамен және Сыртқы істер министрінің орынбасары П.Давлатзодамен өткен кездесуде тараптар екі елдің қарым-қатынас мәселелерін талқылады. ЭКСПО-2017-нің комиссары Астана қаласында өткізілетін Халықаралық көрмеге дайындық барысы туралы әңгімелеп, Қа­зақстан Республикасының Пре­зиденті Нұрсұлтан Назарбаевтың «Жасыл көпір» ынтымақтастық бағдарламасы туралы тілге тиек етті. Өз кезегінде Тәжікстан Пре­мьер-министрінің бірінші орынбасары Д.Саид екі ел арасында қалыптасқан жоғары түсіністік пен бауырластық қарым-қатынастарға жан-жақты тоқталды. Сонымен бірге, Саид мырза Тәжікстан Республикасы үкіметі атынан өз елінің «Астана ЭКСПО-2017» Халықаралық көрмесіне белсене қатысатынын атап көрсетті. Ол тәуелсіз Қазақ­станның елордасында өте­тін бұл жаһандық шара бары­сында Душанбе лайықты орын алатындығын айтты. Эко­но­ми­калық даму және сауда министрі Н.Хекматуллозода Астана қала­сындағы Халықаралық көрмеге Тәжікстан Республикасының қатысу мәселелерін тілге тиек ете келіп, көрмеге қатысу шарттарымен танысу қажеттігін атап көрсетті. ЭКСПО-2017 ко­миссары Р.Жошыбаев екіжақты жүз­десулер барысында елімізде өтетін Бүкіләлемдік жетістіктер көрмесі тақырыбының маңыз­дылығына тоқталып, оның өңір­дегі балама қуат көздерінің дамуына серпінді ықпал ететіндігін нақты мысалдармен ашып көр­сетті. Сонымен бірге, тараптар тау-кен металлургия өнер­кәсібінде, көлік және энергетика саласында белгіленген біріккен жобалардың іс жүзіне асырылу мәселелерін талқылады. Әлемдік экономикадағы келеңсіз жағдайларға қарамастан, екі ел арасындағы сауда-экономикалық байланыстың жан-жақты дамып отырғандығын атап көрсетті. Сыртқы істер министрінің орынбасары П.Давлетзодамен болған кездесуде Тәжікстанда Қазақстанның Мәдени күндерін өткізу мәселелері тілге тиек етілді. Әзірлеген Жылқыбай Жағыпарұлы, «Егемен Қазақстан».