Суретті түсірген – Жұмабай МҰСАБЕКОВ
Аумағы шамамен 470 шаршы метрді құрайтын жаңа ғимарат заманауи стандарттар мен талаптарға толық сәйкес келеді. Онда ем алатын балалар жасына, денсаулық жағдайына қарай екі топқа бөлінген.
«Бөлімді ашудағы басты мақсат – мүгедек балаларға барынша қамқорлық көрсету, оларды өмірге бейімдеу. Мұнда әлеуметтік-медициналық, әлеуметтік-психологиялық, әлеуметтік-педагогикалық көмекті қосқанда, сегіз түрлі қызмет көрсетіледі. Сонымен қатар отбасыларға ыңғайлы әлеуметтік такси қызметтері ұсынылады. Балаларды орталыққа апаратын, қайтып әкелетін 4 автокөлік бар», дейді орталық директорының әлеуметтік мәселелер жөніндегі орынбасары Назгүл Бүркітбаева.
Жаңадан ашылған орталыққа келіп жүрген балалардың ата-аналары осындай мүмкіндікке ризашылық білдіріп, алғысын айтады. Сондай ананың бірі – Сәния Теңізбаева. «Бәйтерек» орталығының тоқтаусыз жұмыс істеуі – бізге үлкен қолдау. Міне, орталықтың жанынан жайлы, жарық, жылы жаңа бөлімше ашылды. Балам кәсіби көмек алып қана қоймай, өзін ұжымның бір бөлшегі, үлкен, тату отбасының бір мүшесі ретінде сезініп келеді. Қызыма орталық мамандарының әрқашан қасында болып, көмектесіп, бағыт-бағдар беріп отыруы маңызды», деді С.Теңізбаева.
Кез келген ата-ана балалары қандай жағдайға тап болса да, әр күні қуанышпен өткенін қалайды. Сол себепті орталыққа жиі келіп, балаларын үнемі бақылап отырады. Қарлығаш Тұтқабаева баласына мамандардың заман талабына сай қызмет көрсеткеніне дән риза.
Жетісу жерінде мүмкіндігі шектеулі жандарға арнаулы әлеуметтік қызмет көрсететін 1566 орындық 13 мекеме бар. Былтыр бұл мекемелер 1512 әлеуметтік қызмет көрсетіп, мүгедектердің емін-еркін жүріп-тұруына мүмкіндік жасады. Сондай-ақ өткен жылы 168 нысанда мүмкіндігі шектеулі жандарға бейімдеу жұмыстары жүргізілді. Биыл Талдықорған қаласында 150 орындық оңалту орталығының құрылысын бастау жоспарланып отыр.
Жетісу облысы
