Жамбыл облысы әкімдігі жұмыспен қамтуды үйлестіру және әлеуметтік бағдарламалар басқармасы басшысының орынбасары Самат Төрегелдиев келтірген дерек бойынша, өңірге өткен жылы келген қандастардың 88,7 пайызы көршілес Өзбекстан Республикасынан қоныс аударса, 4, 3 пайызы Қырғыз Республикасынан, қалған 6 пайызы өзге мемлекеттерден келіпті.
«703 отбасыдан құралған 1198 азаматқа қандас мәртебесі берілді. Сондай-ақ, 95 отбасыдан тұратын 116 адамға қандас мәртебесі ұзартылды. Президент тапсырмасына сәйкес 2023 жылдың шілдесінен бастап, шетелде тұрып жатқан қазақтарға арналған арнайы «Ата жолы» карталарын беру үрдісі қолға алынды. Алайда әзірге облысқа «Ата жолы» бағдарламасы аясында этникалық қандастар өтініш білдірмеген. Аталған картаның басты басымдықтарының қатарына шетелдегі ұлты қазақ ағайындарымыздың 10 жылға дейін біздің елде тұруға және жұмыс істеуге, әлеуметтік көмектер, тегін білім алуға, бизнес ашуға келген елінен азаматтығын сақтай отырып жұмыс жүргізуге мүмкіндік береді», дейді С. Төрегелдиев.
