Өңірде Баукең туған Жуалы ауданында арнайы мемориалдық музей бар. Бұдан бөлек, облыстың 80 жылдығында ашылған «Даңқ» залында да Баукеңнің біраз мұрасы сақталған.
«Даңқ» залында тұрған жәдігер тұсындағы «Маузер полковника Бауыржана Момышулы» деген жазу көзге оттай басылады. Дерекке сенсек, Бауыржан Момышұлынан қалған құнды жәдігер 1965 жылы облыстық тарихи-өлкетану музейіне тапсырылған екен.
«Бұл қару – Панфилов дивизиясының полковнигі Бауыржан Момышұлынікі. Бізде бар дерекке жүгінсек, маузер металл, ағаш және қайыстан жасалған. Саналы ғұмырын әскери қызметке арналған батыр осы қаруды соғыс жылдарында пайдаланған.
Нақты деректерге сенсек, батыр көзі тірісінде жәдігерді облыстық тарихи-өлкетану музейіне тапсыруды жөн деп тапқан екен. Бұл туралы өсиет хат та жазылған», дейді облыстық тарихи-өлкетану музейінің ғылыми қызметкері Әмірбек Нұрзат.
Жалпы, 2019 жылы ашылған «Даңқ» залында батырдың бірқатар жәдігері сақталған. Өңірге сырттан келген туристер Баукеңнің мұрасымен танысу үшін арнайы осында ат басын бұрады. Облыстық тарихи-өлкетану музейіне қарасты ғимаратта Баукеңнің өмірі мен қызметін зерттеумен айналысатын «Бауыржантану» зерттеу орталығы да жұмыс істеп тұр.
Тараз
