Палата спикері өз сөзінде төртінші кезең түлектеріне ілтипат білдіріп, жоба елдің талдамалық әлеуетін дамыту жолында айрықша маңызға ие екенін айтты. Сондай-ақ ол аналитика мен цифрлық технологиялар экономиканың, мемлекеттік саясаттың және бизнестің ілгерілеуін анықтайтынын, ал жаңа білім қатысушыларға тиімді шешім қабылдауға септігін тигізетінін атап өтті.
Төртінші кезеңнің қорытынды күнінде командалар әзірлеген баяндамаларын таныстырды. Олардың үздіктерін сарапшылар мен түлектердің өздері анықтады. Баяндамалардың тақырыптары білім берудегі инклюзия, гендерлік теңгерім, заң шығару қызметіндегі жасанды интеллектің рөлі, Орталық Азиядағы орнықты даму сияқты өзекті мәселелерді қамтиды. Қорытынды материалдар төртінші кезеңнің талдаулар жинағында жарияланып, Парламент депутаттарына, сондай-ақ сараптамалық ұсыным ретінде салалық мемлекеттік органдарға жолданады.
«Бірнеше аптаға жалғасқан оқу кезінде сіздер жеті негізгі бағыт бойынша топтық баяндамалар даярладыңыздар. Олардың бәрі Қазақстанның стратегиялық мүдделерін көздейді және Президент Қасым-Жомарт Тоқаев айқындап берген бағдардың күн тәртібімен үндес. Осы бағыттар бойынша өздеріңіз аналитикалық материалдардың тақырыптарын ұсындыңыздар. Сіздердің жұмыстарыңызды талдай отырып, біз тек түпкілікті нәтижені емес, сонымен қатар дайындық үдерісін, яғни деректерді жинау мен талдаудан бастап, тұжырымдар мен ұсыныстарды дәлелдеуге дейінгі еңбектеріңізді бағаладық. Осы ретте биыл баяндамалардың деңгейі айтарлықтай жоғары екенін атап өткім келеді. Жан-жақты ізденіспен әзірленген озық жұмыстар мен әлі де жетілдіруді қажет ететін материалдар арасындағы алшақтық қысқарған. Бұл баяндамаларды дайындау сапасының артқанын және қатысушылардың тақырыпты терең түсінгенін көрсетеді», деді М.Әшімбаев.
Айта кетейік, биыл Мектептің төртінші кезеңіне қатысуға өтінім бергендердің қатары көп болды. Нақты айтқанда, бір орынға 12 адамнан келді. Бұл – жоба тарихындағы ең жоғары көрсеткіш. Сондай-ақ мұндай үрдіс жас мамандардың аналитикалық тәсілдерді меңгеріп, өз қабілеттерін шыңдай түсуге деген қызығушылықтың артып келе жатқанын білдіреді. Кезең аясында 14 команда құрылды. Қатысушылармен 32 дәріс оқушы және 15 ментор жұмыс істеді. Одан бөлек тыңдаушылар бизнес-ланч форматында түрлі мемлекеттік органдардың басшыларымен де кездесті. Дәрістердің жалпы көлемі 60 сағаттан асады. Биыл жоба кезінде өңірлердің қамтылуына да баса мән берілді. Соның нәтижесінде облыстардан келген қатысушылар саны үш есеге артты.
«Data-driven decision-making-тегі талдау және цифрлық тетіктер» осы кезеңнің негізгі тақырыбы болды. Бүгінде компаниялар мен мемлекеттік құрылымдар аналитикалық платформаларға және деректерге негізделген шешімдерді қолдану арқылы тиімділікке қол жеткізуді көздейді. Ұлттық банктің, Отбасы банкінің, Ұлттық статистика бюросының тәжірибелерінен деректерге негізделген осындай талдаулар көп деңгейде қолданылатынын және қажет екенін көрдіңіздер. Оқу барысында сіздер жаңа нәрсені үйреніп, командалық қабілетті дамытып қана қоймай, кәсіби байланысты нығайтып, серіктестер тауып, басқа мамандармен алдағы ынтымақтастықтың берік негізін қаладыңыздар. Мұның бәрі – өздеріңіз үшін мол капитал. Осы жобадан кейін де оның игілігін көресіздер деп сенемін», деді Сенат төрағасы.
Сондай-ақ палата спикері мектеп түлектері Қазақстанда аналитиканың дамуына елеулі үлес қосатынына, ал аталған жоба тек білім беру курсы емес, елдің болашағы үшін жұмыс істейтін кәсіби сараптамалық қоғамдастықты қалыптастыратын алаңға айналатынына сенім білдірді.
Сонымен қатар қатысушыларға Nazarbayev University президенті Вакар Ахмад «Evidence-based policy және академиялық қоғамдастықтың рөлі» атты дәріс оқыды. Ол өз дәрісінде мемлекеттік саясатты қалыптастыру үдерісінде деректерді сапалы талдаудың маңызы зор екенін айтты.
Дәстүрге сәйкес Талдау мектебінің төртінші кезеңіндегі дәрістердің видеонұсқасы Мектептің ресми YouTube-арнасында жарияланады.
