Президент: бюджет қаржысына мерейтой жасауды қою керек

АСТАНА. 11 ақпан. Бюджет қаржысы есебінен мерейтой жасаудан тыйылу керек. Бүгін Ақордада өткен Үкіметтің кеңейтілген отырысында Елбасы Нұрсұлтан Назарбаев осылай деді. Бұл туралы «ҚазАқпарат» хабарлады. «Бізде мерейтой жалпыға ортақ сүйікті іс болып отыр. Мерейтой қайда болса, бәрі сонда. Жиындарға қатысу, банкеттерде отыру, осылай жалғаса береді. Әлемнің қай жерінде біз сияқты мерейтой өткізеді? Ұлы даталарды атап өтіп, баспасөзде, телеарналарда, ғылыми-тәжірибелік конференцияларда айту керек. Ал дүркіретіп той ұйымдастыру, айдалада мыңдаған қазақ үй тігу мерейтой иесіне не берерін айтыңдаршы маған?», - деді Елбасы. Сондай-ақ Президент ұлы бабаларымыз жайында бұқаралық ақпарат құралдары кеңінен ақпарат таратуы керектігін ерекше баса айтты. «Мерейтойды туған-туысы, демеушілер өткізсін. Менің қарсылығым жоқ. Бірақ, тек мемлекеттің қаржысына емес», - деді ол. Сәкен Майлыбай.