Заң жобасы бірінші оқылымда мақұлданды

Кеше палата Спикері Қабиболла Жақыповтың төрағалығымен Мәжілістің жалпы отырысы өтті. Халық қалаулылары  «Қазақстан Республикасындағы бағалау қызметі туралы» заң жобасын ілеспелі түзетулерімен бірінші оқылымда мақұлдады. Мәжіліс депутаты, Заңнама және сот-құқықтық реформа комитетінің мүшесі Мұхтар Тінікеевтің атап өткеніндей, заң жобасы Үкіметтің заң жобалау жұмыстарының 2014 жылға арналған жоспарына сәйкес әзірленген және бағалау қызметі саласындағы заңнаманы оның реттеу жүйесін өзгерту, халықаралық стандарттарды енгізу арқылы жетіл­діруге бағытталған. Заң жобасы міндетті бағалау тек қана мемлекеттік мүлікті жекешелендіру, сенімгерлік бас­қаруға не жалға (кейіннен сатып алу құқығымен жалға) беру үшін, сондай-ақ, неке келі­сім­шарттарын жасасу және мү­ліктің құны туралы дау туындаған жағдайда ажырасу­шы ерлі-зайыптылардың осы мүлкін тараптардың біреуінің немесе екі тараптың да талап етуі бойынша бөлу, салық салы­натын базаны есептеу ту­ралы дау туындаған жағдай­да салықтардың төлену дұ­рыс­тығын бақылау мақсатында бағалау объектілеріне бағалау жүргізілетіні туралы нормамен толықтырылды. Сондай-ақ, Мәжіліс депутаттарына тұрақты комитеттер мен заңнама бөлімінен келіп түскен барлық ескертпелер мен ұсыныстар қарастырылып, талқыланған. Сонымен қатар, Мәжіліс депутаттары «Еуразиялық эко­номикалық комиссияның бәсе­келестіктің бірыңғай қағи­даларының сақталуын бақылау жөніндегі өкілеттіктерді жүзеге асыруы кезінде құпия ақпаратты қорғау тәртібі және оны жария еткені үшін жауаптылық туралы келісімді ратификация­лау туралы» заң жобасын мақұлдады. Асқар ТҰРАПБАЙҰЛЫ, «Егемен Қазақстан».