Еуроодақтағы үлкен инвестордың бірі

Кеше Ақордада Мемлекеттік хатшы Гүлшара Әбдіқалықова Италия Республикасының Қазақстандағы Төтенше және өкілетті елшісі Стефано Раваньяны қабылдады. Мемлекеттік хатшы елшіні Қа­зақстанда қызметке кірісуімен құт­тықтай келіп, екі елдің ара­сын­дағы сауда-экономикалық ынтымақтастықтың жылдан-жыл­ға артып келе жатқанына қанағат білдірді. Бұл іске Президент Нұр­сұлтан Назарбаевтың 2009 жылы Италияға жасаған ресми сапары тың серпін бергенін айта келіп, Г.Әбдіқалықова сол сапарда Стра­тегиялық серіктестік туралы мем­лекетаралық келісімге қол қойылғанын атап өтті. Одан әрі Мемлекеттік хатшы Ита­лияның Қазақстан үшін әлем­дегі үшінші орында тұрған сау­да әріптесі екендігін және елі­міз­дің экономикасына аса ірі кө­лемде инвестиция құюшы еке­нін де еске алды. Қазақстанның Еуро­одақ елдерімен арадағы тауар айналымының 13 пайызы Ита­лия­ның үлесіне тиеді. Ал Италияның Қазақстан экономикасына салған инвестициясының жалпы көлемі 6,5 млрд. АҚШ долларын құрайды, деді ол. Одан әрі Г.Әбдіқалықова Ита­лияның Аквил қаласында болған жойқын жер сілкінісінен кейін Қазақстан Италия халқымен достықтың белгісі ретінде осы қаладағы «Амитернумдегі қасиетті Биаджо» шіркеуін қайтадан қал­пы­на келтіруге 1,7 млн. еуро көле­мінде қаржылық көмек бергенін айтты. Кездесу барысында екіжақты әріптестіктің бүгінгі жай-күйі мен ынтымақтастықты одан әрі дамы­тудың болашағы, оның ішінде ита­лиялық компаниялардың индус­трияландырудың екінші бесжыл­дығына, «Нұрлы Жол – болашаққа бастар жол» атты Президент Жолдауында белгіленген Жаңа Экономикалық Саясаттың аясын­дағы инфрақұрылымдық даму жоспарының жобаларына қатысу мүмкіндіктері талқыланды. Мемлекеттік хатшы Қазақстан өзінің жеке ұлттық павильонын ұсыну арқылы Италияның Милан қаласында өтетін «ЭКСПО-2015» халықаралық көрмесіне белсене қатысуға ниетті екенін жеткізді. Сондай-ақ, Г.Әбдіқалықова ита­лия­лық әріптестердің Астанада болатын «ЭКСПО-2017» көрмесінің жұмысына белсене қатысатынына үміт білдірді. Сонымен қатар, кездесуде Қа­­зақстан мен Италия арасын­дағы өзге де іскерлік және мәде­ни-гу­ма­нитарлық қарым-қаты­нас­тар­ды нығайтудың мәселелері талқы­ланды. Жақсыбай САМРАТ, «Егемен Қазақстан».