ПАВЛОДАР. 13 ақпан. Павлодарда «Ермұхан Бекмаханов және оның отандық тарихқа қосқан үлесі» атты республикалық конференция өтті. Бұл туралы egemen.kz тілшісі хабарлады.
Сұлтанмахмұт Торайғыров атындағы Павлодар мемлекеттік университетінде өткен конференция жұмысы Ермұхан Бекмахановтың ескерткішіне гүл шоқтарын қойып, ғалым рухына тағзым етуден басталды. Содан соң жиналғандар «Рухы мәңгілік ғұлама» атты кітап көрмесін тамашалады. Отандық тарихтың негізін салғандардың бірі Ермұхан Бекмахановтың 100 жылдық мерейтойы Қазақ хандығының 550 жылдығымен қатар келіп тұр.
Ермұхан Бекмаханов 1915 жылдың 14 ақпанында Баянауылда туған. Ұлтының шыншыл тарихын жазғаны үшін Сібірде айдауда болды.
Конференцияға құрметті қонақ болып келген профессор Надия Бекмаханова әкесінің еңбектері мен қайраткерлігі турасында айтып берді.
Жалпы, университеттегі Ермұхан Бекмаханов орталығы осы күнге дейін 200-ден астам ғылыми туындыларды жарыққа шығарыпты. Пленарлық отырыс кезінде Ш.Уәлиханов атындағы Тарих және этнология институтының директоры, профессор, Ұлттық ғылым академиясының корреспондент мүшесі Ханкелді Әбжанов «Е.Бекмаханов тұлғасы замандастары көзімен» атты ғалым өмірі мен шығармашылығына арналған баяндама жасады. Сондай-ақ осы күні «Ермұхан Бекмаханов және тарихи шындық» атты тағы бір жаңа кітаптың тұсаукесері болды.
Жиын соңында Ермұхан Бекмахановтың 100 жылдық мерейтойына арналған үздік ғылыми жұмыстар байқауының нәтижелері бойынша студенттер марапатталды.
Фарида Бықай.
Дерек, сурет: egemen.kz.
