БІРЛІГІМІЗ ЖАРАСҚАН!

ҚАЗАҚСТАН – КЕҢ БАЙТАҚ, ОРТАҚ ОТАН

Қарқарада өткен жастар форумы ел мерейін айшықтады

Ән мен жырдың бесігі, Қызыр да­рып, құт қонған Аспантаулар етегінде шалқыған шеру өтті күні кеше. Оның атауы ел жүрегінде атойлаған “Қазақстан – кең бай­тақ, ортақ Отан” деп аталып, бұған дейін өңірдегі аудандар мен қала­лардағы “Бірлігіміз жарасқан!” ақциясы жалғасып, жастардың қо­ғамдық, саяси белсенділігін арт­тыруға қозғау салғанын, олардың туған жерге деген мөлдір сезімі мен Отанына деген сүйіспеншілігін арттыруға жолбасшы болғаны өту барысында айқын аңғарылды. Осы орайда, данышпан Абайдың “Те­гінде, адам баласы, адам баласынан ақыл, білім, ар, мінез деген қасиет­те­рімен озады” дегені бүгінгі тол­қынға арналғандай. Жетісу жерінде өткен жастар форумдары мен фес­тивальдерінде осы ұлы мұрат, биік талап барынша айқындала түсті. Райымбек ауданындағы аталған мерей Кеген ауылынан 30 шақы­рым қашықтықтағы Қарқара жай­лауында өтуінің өзіндік астары бар. Өйткені, халқының азаттығы үшін құрбан болған Ереуілтөбедегі боз­дақтарға арналған ескерткішке тағ­зым еткендер сол кездегі саясатқа қарсы шыққан көтерілісшілердің қаһармандығын тағы бір еске түсіріп, ерлігі алдында перзенттік парызының өтеуіндей болды. Тәуелсіздікті аңсаған батырлардың аруағына құран бағышталған соң көпшілік мерейлі сәттің ендігі бө­лігін аспан түстес Туымызды биік тұғырға орнатумен өрді. Өйткені, көгілдір Ту бүгінгі егемендіктің, қа­з­ақ жастарының ар-намысының биіктігін, аға ұрпақтың дәстүріне адалдығын жаңа бір қырынан та­нытқандай, самал желмен тербеліп, биіктей берді... Жігерлі, қайраты мол, жүрегі елім деп соққан жастар форумына өңірдегі аудандардағы ішкі саясат бөлімдері мен жастар ұйымдары, аға буын өкілдері қатысып, бел­сенділіктерін жаңа бір қырынан жарқыратты. Фестиваль Ереуілтөбедегі көте­ріліс құрбандарына қойылған ес­керткішке гүл шоқтарын қоюмен, аудан орталығындағы №2, №3 Ке­ген және басқа орта мектеп оқу­шылары ұлттық рәміздерімізді, жү­рекке нұр құйған өрелі сөздермен өрнектелген жастар шеруімен жал­ғасты. Туған Қазақстанымыз, Мем­лекет басшысы жайлы өсиетті сөз­дер, айшықты ұрандар көтеріліп, туы­мыз желбіреп, Әнұран шыр­қал­ды. Бір айта кетерлігі, аудан аума­ғын­дағы 23 селолық округтегі жас­тар ұйымы мен тағы басқа елді ме­кен жұртшылығының көңіл-күйлері көтеріңкі, ертеңгі күндеріне деген сенімдерімен танылды. Жастар де­се, жастар. Бәрі де жарасым тапқан. Түгін тартса, майы шыққан, жа­сыл шалғынды жайлау төрінде “Қа­зақстан” сөзі айшықты жазылса, екі қанатқа Райымбектей абыз баба мен тәуелсіз Қазақстанның тұңғыш Президенті Нұрсұлтан Назарбаев­тың еңселі портреттері қойылып, жастардың алдында осындай асқақ тұлғалар тұрғанда олардың мақсат­тары биік, армандарының асқаралы болатыны өмір заңдылығындай болды. – Бүгін Қарақарада үлкен ме­реке. Арманы асқақ жастардың об­лыстық фестивалі жалғасын тауып отыр. Жастар саясаты – еліміздің ма­ңызды бағыты. Өткен тарихы­мызды түгендемей, болашағымыз тү­генделмейді. Бүгін жүздеген ша­қырымнан келген қонақтарға, жас­тарға өмір өрінде сәттілік тілеймін. Қазір ауданда 22544 жас бар. Олар “Жасыл ел” бағдарламасына белсе­не қатысып, туған жерін көркейтуге өзіндік үлесін қосып отыр. Жас­тар­дың саламатты өмір салтын қа­лып­­­тас­тыруына да барлық жағдай жасалған. Қасиетті Хан­­тәңірі Райымбектей батырды, Мұқа­ға­лидай ақынды, Бер­дібек пен Бақ­қо­жадай қалам­гер­лерді, Сағаттай қай­раткерді берген өр өлке, деді жастар алдында сөйлеген Райымбек ауданының әкімі Аян Айтжанов. Қазақстан Республикасы Пре­зи­денті Әкімшілігі Ішкі саясат бө­лімінің меңгерушісі Дархан Мың­бай жиналғандарға ой салатын тың пікір, ұтымды ойын ортаға салды. – Қай кезде болмасын, бардың бағасын білу ­– ардың ісі. Қашанда ынтымақ пен бірлік қасиетті ұғым. Осы орайда, көршілес қырғыз елін­­дегі бүгінгі жайсыз жағдайды ой елегінен өткізсек, біріккенде ешқа­шан ұтылмаймыз. Елбасы айтқан­дай Қазақстанның болашағы мұнай мен қазба байлығында емес, білімді жастарда екендігіне күн санап көз жеткізілуде. Бүгінгі “Бірлігіміз – жарасқан” акциясы кезінде бір адамға бір жылы сөз айтсақ, көмек көрсетіп жатсақ, соның өзі үлкен сауап. Жақсы іс қана жарқырап, со­ңына өшпейтін із қалдырады. Осы бағытта көп жұмыс қолға алы­нып жатыр. Облыс әкімі Серік Үм­бетовтің бастауымен өңірде ауқым­ды жұмыстар қолға алынған. Оған қуанамыз. Бізді адастырмайтын аға ұрпақтың өнегелі жолы. Елбасы­мыз­дың Жолдауына арқау болған Сәбит атамыз, Еңбек Ері Жолсейіт атамыз арамызда отыр. Бұл жастар үшін, біз үшін үлкен қуаныш, зор мәртебе десем артық айтпағаным. Әрдайым еңбектің қадірін біліп, ортақ Отанымызға өзіндік қолдау көрсеткенімізді сезінсек, соған ұмтылсақ, одан өткен қуаныш жоқ. Бүгінгі фестиваль жұмысына сәттілік тілеймін, деді. Жастар алдында сөйлеген ау­дан­дық ардагерлер кеңесінің тө­рағасы Сәбит Оразаев, Қарасаз ауы­лындағы Албан-Асан Барман­бекұлы атындағы орта мектеп оқушысы Қадырақын Сабыржан құттықтау лебіздерімен жұртшы­лықты бір серпілтіп тастады. Жастардың басқосуы дүркіреп өтіп, жайлау төрі қызық думанға ұласты. Форумда аудандағы өнерлі жастар лайықты марапатталды. Саламатты өмір салтын ұстанған ауыл жұртшылығы қыз қуу, көк­пар тарту, аударыспақ тәрізді ұлттық атспорты ойындарын та­машалады. Жеңіспен жігерленгендерге жиналғандар “Бәрекелді!” десіп, құрмет көрсетіп, дем беріп жатты. Сондай-ақ, жастар көрермендерге Қарқарадағы Жамбыл мен Сара­ның айтысынан үзінді орындап, сах­­наландырылған көрініс те кө­рер­­мен­нен бағасын алды. Аспантаулар аясындағы абыз баба атындағы ауданның бір жағы қырғызбен, енді бір жағы қытаймен шектесіп, бүгінгі бірліктің ұста­ны­мына беріктігін таныта түскендей. Бүгінде сексен бес мыңнан астам халық мекендейтін аудан жұртшы­лығының ынтымағы мен бірлігі, салт-дәстүрге беріктігімен тәнті етіп, жастардың өрелі істерімен өр­нек­телді. Күмісжан БАЙЖАН. Алматы облысы.

_______________

БҰРЫН БОЛМАҒАН ҚЫЗЫҚТЫ ЖОБА

немесе “Титандар тартысы”

Азиаданы күтуге барын салып жатқан Алматының бүгінгі тіршілігі толассыз. Қаланың күре жолда­ры­ның бәрі күрделі жөндеуден өтуде. Ғима­раттар жаңа кейіпке еніп, ша­һар за­манға сай қайта абаттан­дырылуда. Аламан дайындықпен алысқан тынымсыз күндерде оңтүстік аста­нада саламатты өмір салтын наси­хат­тауға бағытталған шаралар легі де көбейіп келеді. Соңғы сенбі қа­ла­­лықтар үшін естен кетпестей ду­манды болды. “Бірлігіміз жарас­қан!” республикалық ақпараттық нау­қанының аясында өткен шара­лар шаһардың барлық тұсын қамтыды. Таң алдында тұсауын кескен бұқаралық спорттық жарыстарды қала әкімі Ахметжан Есімов ашып берді. “Армандар кубогы” деп ата­ла­тын спорттық шараларға сала­мат­ты өмір салтын ұстануға ұмтылған, велосипед тебе алатын, маутинбайк, стритбол, жағажай волейболы мен жүгіруді ұнататын әрбір қала тұрғыны қатысуға мүмкіндік алды. Бір күнде адам спортшы болып кетпесе де, осы ұмтылыс, осынау бастамалар алматылықтарға тамаша көңіл-күй сыйлап, спортпен шұғыл­дану ниетіне бір табан болса да жақындатып кеткенін байқадық. Ал Әл-Фараби мен Достық даң­ғылынан бастау алған веложарысқа 500-ден астам адам қатысты. Қа­ла­ның келесі жағындағы На­уаи даңғы­лында жатқан мәре сы­­зы­ғына ұдайы велосипед теуіп шы­ныққандар шар­шамай-ақ жетіп алды. Бұл кезде Орталық демалыс жә­не мәдениет саябағында стрит­бол­дан жарыс жүріп жатқан болатын. Сол секілді мүмкіндігі шектеулі жан­дарға да арнайы спорттық жа­рыстар ұйымдастырылып, жігерлі өткен сайыстар жұрттың көңілін көтеріп кетті. Абай мен Алтынсарин кө­шеле­рінің қиылысындағы Отба­сы­лық саябақта бұқаралық-сауықтыру гим­настикалары өтті. Қызықты өт­кен бұл акцияға да көпшілік ілесіп, сенбінің бір күнін көңілді өткізді. Баршаны бірлікке шақырып, салауатты шаралардың айналасында тоғыстырған бастамалар легі мұны­мен де толастаған жоқ. Кешкісін Медеуде “Армандар кубогына” қатысқан барлық спортшылар мен қала тұрғындарының ішінен үзіліп шыққан үздіктер марапатталды да, “Бірлігіміз жарасқан!” акциясы тамаша музыкалық жобаға ұласты. “Медеу” мұз айдынында өткен “Титандар тартысы” концерті елі­міздің ең танымал әзілкеш артистері мен Ресейдің әйгілі өнер жұлдызы Тиматиді тарту етті. Қысқасы, “Тамашаның” тарлан­да­­ры “Наша казаша” жігіттерімен өнер көрігінде қайнап, “Титандар тар­ты­сы” атты бұрын-соңды болма­ған ой­ын-сауық жобасының сәнін келтірді. Тамаша өткен концертте қала тұр­ғындары өздерінің сүйікті эс­тра­да жұлдыздары – Нағима Есқа­лие­ва, Мәдина Сәдуақасова, Жәмила Серкебаева, Сейфуллин Жолбарыс, Ақжол Мейірбеков, Толқын Заби­ро­ва, Бақыт Шадаева, Парвиз Наза­ров, Қайрат Түнтеков және “Үр­кер”, “Дауыс интернешнл”, “Жадо” топ­тарын, “L”, “Арнау” дуэттерін тың­­дап, демалыстарын әсерлі өткізді. Айнаш ЕСАЛИ. АЛМАТЫ. ________

АҚЖАЙЫҚТА  БАЙРАҚТЫ БӘСЕКЕ

Орал қаласында шілде айының 3-6 күндері Президент жүлдесі үшін республикалық ІV  халықтық спорт ойындары өтеді. “Бірлігіміз жа­расқан!” акциясы аясындағы ой­ын­дарда қатысушылар 14 спорт тү­рі бойынша бақ сынасады. Жа­рыс­қа Астана мен Алматы қаласы ко­ман­далары және еліміздің 14 об­лысының спортшылары қатысады. Бір айта кетер жай, волей­бол­дан ерлер мен әйелдер ара­сындағы кез­де­сулер  маусым айының 21-27 күн­дері өткен бо­ла­тын. Оған 14 ер, 10 қыздар командасы қатысты. Нәти­же­сінде ерлер арасында Батыс Қазақ­стан облысының коман­дасы бі­рін­ші орынды иеленсе, екінші ор­ын Шы­ғыс Қазақстан облысы, үш­ін­ші орын Алматы облысының ко­мандасына бұй­ырды. Ал қыздар ара­сында Шы­ғыс Қазақстан облы­сы­ның коман­дасы бәрінен үстем бол­ды. Екінші орынды Батыс Қа­зақ­стан облысы, үшінші орынды Сол­түстік Қазақстан облысынан келген команда еншіледі. Алты аталым бойынша үздік та­нылғандар мен жеңімпаз командалар арнайы сыйлықтармен марапатталды. Темір ҚҰСАЙЫН. ОРАЛ.

________________________

АУЫЛ АЖАРЛАНА ТҮСТІ Қандай да бас­та­маның баян­ды­лы­ғы қаншалықты қол­дауға ие бо­луы­на байланысты. “Нұр Отан” ХДП Ақ­төбе облыстық фи­лиалы “Жас Отан” жастар қа­на­ты­ның “Ауыл­дың гүл­денуі – Қа­зақ­стан­ның гүлде­нуі” атты бағалы бас­та­ма­сы ел бой­ын­ша қол­дауға ие болып, жастар арасын­дағы марафон – эстафетаға ұласуы да осыған нақ­ты мысал. Бұл марафон-эстафетаға ұйымшылдығы басымдау қалалық жерлерді былай қойғанда, алыс ау­ыл­дардағы жастар да бірауыздан үн қатты. Осындай өз ауылының ажар­лы болуына бір кісідей қатысқан Хазрет орта мектебінің 35 оқушысы “Хазрет” және “Қолғанат” атты отрядтарға топтасып жұмыс істеді.. Балалар жұмысқа кірісер алдында мектептің медбикесі А.Дәулетова олардың денсаулығын тексеріп, жалпы жұмысқа деген әл-ауқатын байқап, еңбек етуге рұқсат берді. “Хаз­рет” және “Қолғанат” отряд­тарының жетекшілері Г.Әділова мен С.Дүйсенбин балалардың жағдайын қарастырып, жұмысты жеңіл де тез атқарудың жолдарын ұйымдас­тыр­ды. Атқарылған шаруалардың н­ә­ти­жесін қорытындылау осы орта мек­тептің тәрбие-ісі жөніндегі орын­ба­сары А.С.Жұбатқанға жүктелген екен. Оның айтуынша, үш аптада ма­рафон-эстафетаға қатысушы Хаз­рет орта мектебінің жоғары сынып оқу­шылары қыруар шаруа тынды­ры­п­­ты. Бұрын-соңды мұндай игі­лікті көрмеген ауыл басшылары мен үлкендері жастардың ұйымшылдығы мен еңбекқорлығына дән риза бо­лыпты. Жаз бойы селтеңдеп бос жүр­мей, Хазрет ауылындағы 180 үй­ден тұратын алты көшенің бойын күл-қоқыстан, ауыл ортасынан өте­тін Шынтас өзенінің жағалауы мен табанын тазартқан, 3 тонна тұрмыс­тық қалдықты ауыл сыртына шы­ғар­­ған жастардың еңбегі қалай мақ­тауға да лайық. Олар бұдан басқа 150 ағаш көшеттерін отырғызып, ағаш­­тардың қураған бұтақтарын кесумен де айналысыпты. Ауылдағы иман­ды­лық үйі мешіттің айналасын та­зар­тып, қоршауларын қалпына кел­­­тіріп, әп-әсем етіп сырлап беріпті. – Балалардың туған табиғатты ая­лауға деген қызығушылығы арт­ты. Орман алқабын сынған ағаш­та­дан және ауыл көшелерін күл-қо­қыстан тазалап жүрген арнаулы үл­гі­дегі киім киген оқушылар алыс­тан-ақ байқалып, жұртшылықтың ризашылығына бөленді. Жас мара­фон­шыларға “Хазрет” ЖШС ди­рек­торы Сырбай Тәңірбергенов құ­рал-жабдықтан, көліктен көмек бер­ді. Сөйтіп, ауылымыз адам та­ны­мастай ажарланып, әсемденіп қал­ды, – дейді ауылдық округтің әкі­мі Мәтен Сақтапберген. Көп ұлт­тың өкілдері тұратын бір ауылдағы оң өзгеріс бұл. Бірлігі жарасқан ауылдың ер­теңі бұдан да жарқын, бұдан да жа­ра­сым­ды болатынына сенім мол. Ал, облыс бойынша 70 мың­ға жуық жас­­тар қатысып жат­қан “Ауылдың гүлденуі – Қазақ­стан­ның гүлденуі” марафон-эста­фе­тасының арқасында қаншама ау­ыл, қаншама елді мекен көркейіп, көріктеніп қалатынын есеп­­тей бе­ріңіз, ағайын. Бұл бір жа­ғы жас­тар­ды еңбекқорлыққа баулу, екін­ші­ден, туған ауылыңды, өскен өңі­­рің­ді сүюге тәрбиелеу болса керек. Сатыбалды СӘУІРБАЙ. Ақтөбе облысы.

___________________________________

ЖАСТАР КЕРУЕНІ АУЫЛҒА АТТАНДЫ

Жуырда Қарағанды облысы жас­тары бастамашылдығының ор­та­лығы және “Қазақстан аза­мат­та­ры” қоғамдық бірлес­тігі Абай, Қар­қаралы аудан­да­рында “Жастар – жастарға” ақпараттық-мәдени ке­руе­нін өткізді. Ауылдың тыныс-тір­шілігімен танысу, ауыл жаста­ры­ның өзекті мәселелері бой­ын­ша ақ­параттық-әдістемелік қол­дау көр­сету, оларды қазына­лы өңірімізде, елімізде болып жатқан өзгеріс­тер­мен таныс­ты­ру мақсатында өткен шара 600-ге жуық адамды қамтыды. Абай ауданының Южный кенті­нен бастау алған керуен үш күнге со­зылып, ұлы ақын атындағы ау­дан­ның Құлайғыр ауылына, Қа­ра­бас кентіне жалғасты. Абайдан соң, керуен қасиетті Қарқаралы жеріне жол тартты. Онда Матақ, Т.Әу­бә­кіров ауылдарына барып, керуен мү­шелері жастармен жүздесті. Жос­парланған Көктас ауылында “Жол картасы” бағдарламасы аясында жөн­деу жұмыстары жүргізіліп жат­қандықтан, көш “Жас дәурен” сау­ықтыру лагеріне бағытталды. Ке­ру­ен құрамына жастар ұйымдарының көшбасшылары, студенттер, көңіл­ділер мен тапқырлар клубының, жас шығармашылық ұжымдардың өкілдері қамтылды. Осымен төртінші жыл қатары­нан ұйымдастырылып жатқан ке­ру­ен биыл “Бірлігіміз жарасқан!” ұра­ны­мен өтті. Оның бағдарламасы ая­­сында Е.Бөкетов атындағы ҚарМУ-дің аға оқытушысы Бақыт Өмір­зақова. Ел бірлігі доктринасы ту­расында дөңгелек үстел өткізді. Биылғы жылдан бастап еліміз­дің әр аймақтарында Мемлекет бас­шысының тапсырмасымен жасал­ған үдемелі индустриялық-инно­ва­ция­лық дамудың бес жылдық жос­­­­­па­рын іске асыру басталғаны бар­шаға мә­лім. Тау-кен өндірісі, кө­мір өнеркә­сібі, қара және түсті метал­лур­гия, мәшине жасау мен метал өң­деу, химия және дәрі-дәрмек өн­ер­кәсібі, құрылыс материалдарын өндіруге бағытталған жалпы саны – 100 жоба да керуен назарынан тыс қалмады. Сондай-ақ, керуен бағдарлама­сын­да ауылдық жерде кәсіпкерлік­пен айналысып, өзіндік істі жүр­гіземін деуші жастар үшін арнайы “Ауылдық жерлерде жастар кәсіп­керлігін дамыту” атты семинар-тре­нинг ұйымдастырылды. Облыс әкі­мінің жыл сайынғы ауылдық жас кәсіпкерлер үшін берілетін грант­тары турасында, оған қажетті құ­жаттар төңірегінде, кәсіпкерліктің ауылдық жерде жүргізуге болатын түрлері жөнінде сөз болған семи­нар­ды “Кәсіпкерлікті қолдау және да­мыту қорының” Қарағанды бө­лім­шесінің маманы Сайран Сыз­ды­қова мен “Қазақстан кәсіпкерлері қауым­дастығының” заңгері Дидар­бек Ілімбаев жүргізді. Сайран Бега­лиқызының айтуынша, ауылда кө­біне жастар шаштараз, наубайхана, мәшине жөндеу сервистерін ашып, жұмыстарын жүргізетін көрінеді. “Біз­дің мақсат – оларға кәсіпкерлікті аш­ып беру емес, қолдау көрсету, ал­ға жетелеу”, – деді өз сөзінде маман. Сонымен қатар, балалар құқы­ғын қорғау департаментінің өкілі Мейрамгүл Есенжолова “Балалар мен жастардың еңбегін пайдалану” туралы, Қарағанды облысы ішкі істер департаментінің капитаны Ер­тарғын Мұқанов “Девиантты мінез-құлықты балалар арасындағы құ­қық бұзушылықты реттеу” жөнінде, “Қарағанды облысы жастарының ода­ғы” қоғамдық бірлестігінің тө­рағасы Біржан Әлімжанов “Ауыл жас­тары” жалпыұлттық бастамасы шең­берінде “Дипломмен – ауыл­ға” қоғамдық әлеуметтік маңызы бар жобаны жүзеге асыру” жай­ын­да семинар-тренингтер өткізді. Семи­нар барысында ауылдық жас­тарды алаңдататын өзекті мәселелер тал­қыланып, олардың оңтайлы ше­шілу жолдары да сөз болды. Шара барысында жастарға қа­тысты сұрақтар қамтылған олардың қал-жағдайын анықтайтын әлеу­меттік сауалнама да алынды. Жас­тар бастамашылдығы орталығының маманы Толқын Егишева жүргізген сауалдаманы келер айда қорытын­дылау жоспарлануда. Секциялық жұмыс үстінде жас­тарға ақпараттық-танымдық мате­ри­алдар (үндеу қағаздар, буклеттер, кітапшалар) таратылды. Дөңгелек үстелдер мен семинар-тренингтерді қорытындылаған соң, керуен мү­шелері, көңілділер мен тапқырлар клу­бының ойыншылары Арнат Өт­еп­­бергенов, Аян Шаймұханов, Па­вел Костюченко жиналған жұрт­қа күл­кі сыйласа, Асхат Игембеков әс­ем әнді әуелетіп, халықты бір мар­қайтты. Қарқаралы ұлттық саябағында ор­наласқан “Жас дәурен” бала­лар­дың сауықтыру лагерінде керуен қа­тысушылары “Өзін-өзі тану” се­минар-тренингін өткізді. Керуенді ұйымдастырушы, шарапатты шара­ның ұйытқысы, жастар бастама­шыл­дығы орталығының директоры Гүл­нәр Далабаева жүргізген семи­нар-тренингке Қарағанды қаласын­дағы “Таңшолпан” балалар үйінің 25-тен артық тәрбиеленушілері қа­тысты. Семинар барысында бала­лар­ға сауалнамалар, кітапшалар та­ра­тылып, бейнефильм көрсетілді. Одан кейін көңілділер мен тапқыр­лар клубының ойыншылары бала­ларға КТК ойындарын үйрету бой­ынша шеберлік сабақтарын өткізді. Со­­ңында футболдан жолдастық ойын және концерттік бағдарлама ұйым­дас­тырылды. Бүлдіршіндердің жүзде­ріне нұр ұялатып, айрықша қуаныш құшағына бөлеген КТК ойын­шы­ларына балалар дән риза болды. Аталмыш керуенді өткізу ауыл жас­тарының әлеуметтік жауапкер­шілігі мен елжандылық сезімдерін қалыптастырып, азаматтық бас­та­ма­­шыл­­дықты жандандыруға, кә­сіпкерлік қызметті дамытуға, ауыл мен қала жастары арасында серік­­­тес­тікті дамытуға септігін тигіз­ген­ді­гі хақ. Игі шара келер жылы да өз жалғасын табады деген сенімдеміз. Ербол САРМУРЗИН. ҚАРАҒАНДЫ.

_________________________________________

ЕСІРТКІСІЗ ӨМІРДЕН ЕШКІМ ҰТЫЛМАЙДЫ

“Нұр Отан” ХДП Жамбыл об­лыстық филиалы облыстық ішкі іс­тер департаменті, Жамбыл гума­нитарлық-техникалық университеті және облыстық саламатты өмір салтын қалыптастыру орталығының қолдауымен Жамбыл ауданының Аса ауылында “Есірткісіз өмір!” атты акция өткізді. Акцияны аудан әкімі Махамбет Дүйсембаев ашып, жастар арасында нашақорлық мәселесінің туындап отырғанына алаңдаушылық білдіре келіп, аудан тұрғындары мен жастарды есірткіге қарсы бірігіп күресуге шақырды. Аудан орталығының орталық алаңына жиналған мың жарымға жуық жастар әкім сөзін қолдай­тын­дықтарын білдіріп, нашақорлық си­яқ­ты адамзат баласын азғындатуға апарып соқтыратын жат қылықтың алдын алу мақсатында дайындалған жарнамаларды тұрғындар арасына кеңінен таратуға көмектесті. Олар­дың арасында студенттермен бірге оқушылар да болды. Аудан тұрғын­дарының азаматтық жауапкер­ші­лігін белсендірек қалыптастыру үш­ін жастардың “Өліммен саудалас­қан жерді хабарла!”, “Есірткісіз өмір!”, “Есірткі – өлім!” деген тұр­ғы­дағы ұрандарын акцияға қаты­су­ға келгендер бір үнмен қайталады. Облыстық ІІД есірткі бизнесіне қар­сы күрес басқармасы қызмет­кер­­лері қылмыскерлерден тәркі­леген есірткілер жұрт алдында отқа оранды. Акция өткен алаңның төріне шыққан дәрігерлер, ардагерлер, жастар қозғалысының басшылары орын алып отырған өзекті мәсе­лелер мен соған қарсы өткізіліп жатқан іс-шаралардың маңыздылы­ғына тоқталды. – Нашақорлық індетін жеңу үшін нақты бақылау, қоғамдық қол­дау, есірткі бизнесінің алдын алу мен оған тиімді қарсылық ша­ра­лары қажет. Азаматтардың ден­сау­лығы, олардың белсенділігі мен жастық күш-жігері еліміздің басты байлығы болып саналады. Бүгін осындағы әрбір адам өз таңдауын жасап, нашақорлыққа қарсылық білдіреді деген ойдамыз, – дейді олар. Жамбыл облысындағы наша­қор­лықпен, есірткі бизнесімен кү­рес мәселелері, әсіресе, өңірдің жағ­­рафиялық, транзиттік жағдай­ы­на және Шу өңіріндегі есірткі дай­ындауға қолайлы шикізат қо­рының мол болуына байланысты туындап отырғаны белгілі. Жамбыл облыс­тық ІІД есірткі бизнесіне қарсы күрес басқармасының аға инс­пекторы, полиция подпол­ков­нигі Василий Дубскийдің айтуын­ша, облыста соңғы он жылда есірт­кіге қатысты 12 мыңнан астам қылмыс анықталып, есірткі бизнесі төңіре­гінде топтасқан оншақты ұй­ым­дасқан қылмыстық топ таратыл­ған. Заңсыз айналымнан 90 тонна марихуана, 25 келі қара сора, 150 келі гашиш, 100 келіден астам каннабис смоласы тәркіленген. Ал қылмыстық жауапкершілікке 10 мыңнан астам адам тартылыпты. Акция барысында жергілікті өнерпаздардың орындауында “Ана көз жасы” атты драмалық қойы­лымы көрсетілді. Спорттық жарыс­тар ұйымдастырылды. Аудан тұр­ғын­дарына облыстық ІІД киноло­гиялық қызметі үйретілген итте­рінің иісшілдігі мен ЖГТУ-дан арнайы келген “Бауырсақтар” деп аталатын көңілді тапқырлар клу­бы­ның өткір ойлы қойылымдары да ұнады. Етектен тартқан есірткі мә­селесіне орай қоғамдық пікірді білу мақсатында сұрақтар қойылды. Акция барысында өткен байқау жеңімпаздары сыйлықтармен және мақтау қағаздарымен марапатталды. Көсемәлі СӘТТІБАЙҰЛЫ. Жамбыл облысы.