“ДЕНСАУЛЫҚ” ЖОЛҒА ШЫҚТЫ

Кеше кешкісін Астана вокзалының перронына жиналған жұрттың қарасы мол болды. Өйткені, вокзалдан арнайы емдеу-диагностикалық “Денсаулық” пойызын сапарға аттандыру рәсімі өткізілді. “Қазақстан темір жолы” ҰК” АҚ Төтенше жағдайлар және Денсау­лық сақтау министрліктерімен бірлесе ұйымдастырылған пойыз еліміздің шалғай жатқан стансалары мен разъездері тұрғындарына қолжетімді медициналық көмек көрсетуі тиіс. Еліміздің түкпір-түкпірінде тұ­ратын тұрғындар, теміржолшылар мен олардың отбасы мүшелері бі­лікті маман дәрігерлердің кө­мегімен қамтылмақшы. Арнаулы пойыз төрт медициналық, екі жа­тын, тамақтанатын және дәрі-дәр­мек сақтайтын қойма вагондардан тұрады. 25 медицина қызмет­ке­рі­нің 13-і медбике, қалғаны дә­рі­герлер. Мұнда кішігірім опера­ция­лар жасауға арналған орын да бар. Сондай-ақ УЗИ, эндоскопия құ­рал-жабдықтарымен және арнайы зертханамен қамтамасыз етілген. Бұ­дан басқа невропатолог, кар­дио­лог, окулист және стома­толог сияқты медицина мамандарымен де қамтылған. Пойыздың бас дәрігері Сырым Ажғалиевтің айтуынша, Алматы вагон жөндеу зауытында жасалған вагондар герман, жапон өндірі­сі­нің қазіргі заман талабына сай ме­дициналық құрал-жабдықтарымен жарақтандырылыпты. Вагондар ауа баптағыш, жылы сумен, ал меди­циналық вагондар суды қо­сымша залалсыздандыру құрал­да­рымен жабдықталыпты. Әзірге ша­ра 120 тәулікке есептелсе, ол ке­лесі жылы да жалғасын табуы мүмкін. Шығарып салу рәсіміне ар­найы келіп қатысқан Премьер-Ми­нистр Кәрім Мәсімов те өз сө­зінде мұндай халыққа қолжетімді медициналық көмек көрсетудің саны арта түсерін ерекше атап өт­ті. Қазір ол темір жол бойымен жү­­зеге асырылса, алдағы кезен­дерде мұндай сапалы медицина­лық көмек әуе және автомобиль кө­ліктеріне орнатылған медици­налық орталықтар арқылы шалғай аудандарға жететін болады. Осы ретте “Медициналық апаттың теміржолдық госпиталі” АҚ атыраулық филиалының директоры Шәміл Мұқашев ар­наулы пойыз екі мақсатта жасақ­талғандығына ерекше тоқталды. Бос кездерде халық денсаулығын жақ­сартуға қызмет жасаса, төтен­ше жағдайларда мақсатты қол­данылатын болады. Оның сөзіне қарағанда, жақын болашақта пой­ызға спутниктік телемедицина ор­та­лығы орнатылып, ол арқылы Ас­тана қаласы мен облыс орта­лық­та­рындағы профессор, акаде­мик­тер­ден кеңес алуға мүмкіндік туады. Бұдан басқа пойыз құрамында балалардың ойын алаңдары – ба­туттар да бар болып шықты. Сон­дай-ақ ірі стансаларда қайы­рым­дылық ас беру де өткізіледі деп кү­тілуде. Алдымен арнайы пойыз сол­түстік өңірдің Ақмола, Қос­та­най, Павлодар, Қарағанды және Семей жол бөлімшелері аума­ғы­нан өтіп, ары қарай еліміздің барлық облыстарына сапар шегеді. Соның барысында 57 стансаға аялдайды. Алғашқы бағдарында 36 стансаны қамтып, 28500 адамға медициналық көмек көрсетеді деп күтілуде. Ал екінші бағдар бой­ын­ша 21 станса қамтылып, 14500 адам­ға осындай қолжетімді меди­ци­налық көмек берілетін болады. Асқар ТҰРАПБАЙҰЛЫ. АСТАНА.