ӨРКЕНДЕУ АЙҒАҒЫ – ЖАҢА ӨНДІРІСТЕР

Кеше Елбасы Нұрсұлтан Назарбаевтың Қарағанды облысына жұмыс сапары басталды. Елдің дамуы мен өркендеуінде орны бөлек Қарағанды аймағы көшбасшылық жолына беріктікке әрі биіктен көрінуге ұмтылысын қашанда жарқын істерімен ай­ғақтап келе жатқаны мәлім. Не­гізінен өндірістің алыптары шо­ғырланған өңірдің отандық эко­номикаға қосатын үлесі өте зор болса, индустриялық-иннова­ция­лық бағытты жеделдетуге бет тү­зеуі жаңа белестерге құлаш сер­пілте түсіп отыр. Бұған дәлел жетіп артылады. Аталған мерейлі мақсатқа арнайы жасалған бағдар­лама бойынша республикалық маңызы бар 18 жоба белгіленген. Соның 10-ы биыл іске асырылуға тиіс. Ал 4-і орындалды. Елбасы облысқа жұмыс сапары алдында телекөпір арқылы инвес­тициялық жобалардың тұсаукесе­ріне қатысуы кезінде солардың бірінің, атап айтқанда, Ботақара кентінде болат панельді жылыту ра­диаторлары зауытының ашы­луын көрген еді. Ауылдық жерде, мұның сыртында тұрғын үй құры­лысына аса қажетті осынау бұй­ымның көп мөлшерде шығары­луы­ның жолға қойылуы елеулі оқиға. Бұған дейін Жаңаарқа, Шет аудандарында көмір және темір концентратын өндіретін кеніш­тердің ірге көтеруі аймақтың алыс түкпірлері тынысына тың леп естірген-ді. Кеше түстен кейін Президент Нұрсұлтан Назарбаевты осындай жан жадыратар жаңалықтарымен қарсы алған қарағандылықтар жүрегіне бұл жолғы кездесулердің бір ыстық сипаты бар. Теміртауда, Қарағандыда үлкен еңбек мекте­бінен өтіп, қайраткерлікке қай­рал­ған болашақ Мемлекет басшы­сы­ның қазақстандық тұңғыш шойын алушылар сапында болуы әрдайым мақтаныш тұтылады. Өңірдегі жаңа өндіріс ошақтарымен танысу әрі сол айтулы оқиғаға 50 жыл то­луы қуанышын кешегі әріптес ме­таллургтермен бірге бөлісуге ниет­тестікке, пейіл-ілтипатқа жұрт­шылық разылығы зор бұл күнде. Бүгінде өндірісті өлкенің аты­на заты сай болып келеді. Қара­ған­ды өз басында салынатын, бас­тап­қы­да 50 мың автокөлік шы­ғаратын зау­ыт құрылысына қазық қағыл­ғаны кеше ғана. Ресейлік “Sollers” ААҚ компа­ниясы мен “Сарыарқа” әлеумет­тік-кәсіп­керлік корпорациясы бірлесіп құрған кәсіп­ор­ында 2015 жылы – 187 мың, ал 2020 жылы 254 мың жеңіл көлік түр­лері қа­зақ­стандық тұты­нушы­ларға ұсы­нылатын бо­лады. Ха­лықтың әл-ауқаты жақ­сара түсуіне байла­нысты, бір жа­ғынан, бұл қозғалыс құралына сұранымды қанағаттан­дырудың жолы табылса, екінші жағынан, біраз адамның еңбекке қамты­луына мүмкіндік береді. Мысалы, алғашқы кезе­гінде 1,5 мың, содан соң 3,5 мың адам жұмысқа тартылады. Бұрыннан мақсат ортақ, тілегі үндес көрші мемлекеттермен өзара пайдалы экономикалық ын­ты­мақтастықты тереңдетуге бағыт­талған мұндай жобалардың қата­рына беларустық әйгілі БелАЗ-дар­дың басты тетіктері мен агре­гат­т­ары енді Қарағандыда да жасалуы жатады. Мемлекет басшысы әуежайдан бірден Қазақстан-Беларусь бірлес­кен “ҚазБелАЗ” ЖШС орын теп­кен Қарағанды құю-мәшине жасау зауытына бет алды. Кәсіп­орын цех­тарын аралап, жұмысы­мен та­ны­су кезінде істің аяқ алысын баян етушілер мұнда ауыр сал­мақты атақты жүк көлігінің бі­рінші кезеңде күрделі жөндеуден өткізілетіндігін, қосалқы бөл­шек­тері жасалатындығын, содан соң құрастырылуы басталатындығын айтты. Жалпы алғанда толық күш-қуатына енуі алдағы үш-төрт жыл­да аяқталуға тиіс. Сонда жылына 90 тонналық 5 және 45 тонналық 10 БелАЗ қазба орындарынан кен тасымалдауға жөнелтіліп тұрады. Одан арғы уақытта шығарылу кө­лемі ұлғайып, аталған техникамен қазақстандық тұтынушылар сұра­нымын қанағаттандыру мәселесі ше­шіледі. Бұл жобаны іске асы­рудың салмақты жүгі жүктелген “Қазақмыс” корпорациясы үшін ол өте тиімді болмақ. “БелАЗ”-дар кең қолданыстағы өндіріс алыбы, оны жергілікті орында құрастыру арқылы сатып алыну бағасын екі есеге дейін төмендете алады. Жаңа кәсіпорынға 100-ге жуық адам жұмысқа қамтылған. Со­лардың бірі бірінші цех технологы Жұмағали Аймышев: “Озық тех­нологиялық қондырғылармен, ас­пап-құралдармен жабдықталған мұн­дай өндірісте еңбек ету бә­рі­мізге зор мәртебе. Бір топ әріп­тесіміз жақында Минск зауытында мамандық жетілдіріп оралды. Ос­ын­дай техниканы өзімізде шы­ға­руға қол жеткізу қандай да күрделі міндетті атқаруға дайын екені­міздің айғағы”, деп қуанышына ұжым мүшелері бәрі ортақтығын білдірді. Президент Н.Ә.Назарбаев жұ­мысшылармен, мамандармен, өн­діріс басшыларымен, іскер топ өкіл­дерімен емен-жарқын әңгі­ме­лесіп, ой-пікірлерін ынта қоя тың­дады. Ел экономикасын жаңғырту басты мақсат екенін атай келіп, индустриялық дамудың негізгі ба­ғыттарын жіктеп, талдап көрсетті. “Келешегі зор мұндай өндірістер қатары көбейе түсуі маған үлкен қуаныш. Былтыр Беларусь Респуб­ликасына жұмыс сапарымда “БелАЗ”-ды Қазақстанда да құрастыратын бірлескен кәсіп­ор­ын құру жөнінде ұсыныс жасаған едім. Бізде металл, резина жет­кі­лікті. Ондай жобаны іске асыруға жағдайымыз бар. Мінеки, орын­да­луына із салынды”, деген Елбасы индустриялық даму бағдарламасы арқылы 50 мың адамның жұмысқа қамтылатындығын, тұрғындардың әл-ауқатын көтеру, халық игілігіне қызмет ету жолында іс-шара­лар­дың атқарыла бермектігін атады. Ұжым мүшелерімен жылы қош­тасқан Елбасына деген зор құр­мет, шынайы сүйіспеншілік сезімі олардың жарқын жүз­дерінен аңғарылып, “Жасасын Қазақстан”, “Жасасын Нұр­сұл­тан”, “Рахмет Сізге” деген жан-жақтан жауған алғыс сөздерінен жаңғырып тұрды. Мемлекет басшысы бүгін Те­міртауда өтетін қазақстандық тұң­ғ­ыш шойын қорытылуының 50 жыл­дығы құрметіне мерекелік шой­ын алу рәсіміне, метал­лург­тер­дің салтанатты жиналысына қа­тысып, қалада жаңадан бой көтер­ген нысандармен таны­сады. Айқын НЕСІПБАЙ. ҚАРАҒАНДЫ.